Бүгүн чулуу киһи төрөөбүт күнүгэр кини аатыгар улуус, өрөспүүбүлүкэ таһымыгар араас тэрээһиннэр ыытылыннылар. Онно аны сайын Баатаҕайга буолуохтаах өрөспүүбүлүкэтээҕи ыһыах тэрээһинин хаамыытыгар эмиэ мунньах буолла.
Ол курдук улуус култуураҕа управлениетын салайааччыта Сергей Нафанаилов салайыытынан спорт, култуура, улуус дьаһалтатын нэһилиэктэри кытары үлэҕэ отделын үлэһиттэрэ кыттыылаах, Баатаҕай нэһилиэгин дэлэгээссийэтин кытары сүбэ мунньах тэрилиннэ.
Манна сүрүн иһитиннэриини педагогическэй үлэ бэтэрээнэ Вера Троева оҥордо. Онно кинилэр саамай ыарырҕаталларын, ыһыах спортка сыһыаннааҕынан парады тэрийии буоларын эттилэр. Манна нэһилиэктэр бастыҥ спортсменнарын илдьэ кэлэн анал колоннаҕа хаамсыахтаахтар. Дьэ, манна нэһилиэктэргэ иһитиннэриини тиэрдии мөлтөҕүн аҕыннылар. Олус элбэх киһи кэлэринэн балаакканан түһэргэ анал сир эрэ бэриллэрин эттилэр. Нэһилиэктэр дьоннорун талалларыгар күн-дьыл ыгым соҕуһун тоһоҕолоон эттилэр. Аччаабыта 10 спортсмены таһынан спортивнай дьиэ кэргэн баар буолуохтааҕа этилиннэ.
Атын култуурунай бырагыраамалара барыта былаан быһыытынан баран иһэрэ, култуура управлениетын, олоҥхо дьиэтин кытары хардарыта сүбэлэһэн үлэлэһэллэрин кэпсээтилэр.
Онон бэс ыйын 8 күнүгэр Баатаҕайга Николай Тарскай төрөөбүтэ 100 сылыгар аналлаах спорт ыһыаҕа ыһыллыаҕа.
Афанасий Сектяев