Саха сирин физкультурнай хамсааһынын төрүттээччи, биллиилээх общественнай-политическай деятель Николай Николаевич Тарскай үбүлүөйдээх сылыгар анаммыт тэрээһиннэрбит саҕаланнылар. Үбүлүөйдээх сыл тэрээһинин туһунан СӨ Бырабыыталыстыбатын бэрэссэдээтэлин солбуйааччы Сергей Местников билиһиннэрдэ:
– Былырыын өрөспүүбүлүкэ Ил Дархана Айсен Николаев Н.Н. Тарскай өрөспүүбүлүкэ сайдыытыгар киллэрбит кылаатын учуоттаан туран, онно туһааннаах дьаһалга илии баттаабыта.
Тэрийэр кэмитиэт олохтонон, улуустан уонна төрөөбүт нэһилиэгиттэн Баатаҕайтан этиилэри хомуйан, сүүмэрдээн, олортон талан баран, биир кэлим былааны бигэргэппитэ. Бу былааҥҥа аҥаардас спорт, физкультура эрэ эйгэтинэн муҥурдаммакка, хас да хайысханы хабан былаан оҥоһуллубута.
Бүгүн дойдутугар Уус Алдаҥҥа Николай Тарскай бирииһигэр көҥүл тустууга өрөспүүбүлүкэ чемпионата ыытылла турар. Манна 186 спортсмен кыттыыны ыла кэллэ. Онон үбүлүөйдээх сылы арыйар бу тэрээһин үрдүк таһымҥа ыытыллыа диэн бигэ эрэллээхпин.
Сайын төрөөбүт дойдутугар өрөспүүбүлүкэтээҕи ыһыах ыытыллыаҕа. Баатаҕай нэһилиэгин туруорсуутунан, оскуола капитальнай өрөмүөнүн РФ нацбырайыактарыгар киллэриигэ улахан үлэ ыытыллыаҕа. Ол түмүгэ сыл бастакы аҥаарын иһинэн биллиэҕэ.
Биһиги сүрүн сыалбыт-сорукпут – ыччакка, оҕолорго Николай Тарскай олоҕун-дьаһаҕын уонна үлэтин туһунан, кини спорт хамсааһыныгар киллэрбит кылаатын сырдатыы буолар. Онон оскуолаларга, үөрэх салаатыгар, культура эйгэтигэр былааннаах үлэлэр ыытыллыахтара.
Үүммүт 2024 сыл үбүлүөйдээх тэрээһиннэрин үрдүк таһымҥа ыытар аҥаардас бырабыыталыстыбаттан, улуус дьаһалтатыттан тутулуктаммат, ол хас биирдиибититтэн тутулуктаах. Онон улуус олохтоохторун, улуу киһибитин үйэтитии үлэтигэр бары түмсүөххэ, биир санаанан үлэлиэххэ диэн ыҥырабын.
Наталья Попова
