Байаҕантай нэһилиэгин “Кэнчээри” уһуйааныгар 12-с сылын педагогическай үлэ ветерана, РФ үөрэхтээһинин туйгуна Розалия Готовцева бирииһигэр хабылык, иэрэгэй курдук остуол национальнай оонньууларыгар ыытыллар аһаҕас турнир буолан ааста. Сылын аайы оҕолор оонньуур таһымнара тупсан эрэрин бэлиэтиибит уонна оонньооччу өрөспүүбүлүкэ үрдүнэн элбээн иһэрэ олус үөрдэр. Бу аата өбүгэ оонньуулара сүппэт, симэлийбэт оҥоһуулаах диэн бэлиэтэнэр.
Ыам ыйын 16-17 күннэригэр ыытыллыбыт күрэх кытааччытын ахсаана 150-ҥа тиийдэ. Өрөспүүбүлүкэбит араас муннуктарыттан, о.э. Кэбээйи, Бүлүү, Мэҥэ Хаҥалас, Чурапчы, Горнай, Сунтаар, Уус Алдан улуустарыттан, Мииринэй, Дьокуускай куораттар күөн көрсүһэн, олус үрдүк таһымнаах оҕолор оонньууларын көрдөрөн өссө төгүл сөхтөрдүлэр. Кыттааччы сааһа 3-тэн 11-гэр диэри буолла.
Оскуола алын саастаах оҕолорун икки ардыларыгар хабылык көрүҥэр Сунтаар улууһун Бордоҥ нэһилиэгин, Дьокуускай, Мииринэй куораттан уонна бэйэбит улууспут Найахы нэһилиэгин үөрэнээччилэрэ бастыҥ көрдөрүүлэх таҕыстылар. Уһуйаан иитиллээччилэрэ Найахы, Танда, Чурапчы улууһун Төлөй нэһилиэгэ таһыччы оонньуулары көрдөрдүлэр. Маны таһынан иэрэгэй көрүҥэр кыра саастаах, о.э. үстээх кырачааннар миэстэҕэ киирэн үөрүү өрөгөйүн биллилэр. Кыайыылаахтарга уопсайа 54 мэтээл оонньонно.
Бу оонньуулар нөҥүө сымса, имигэс, түргэн буолуу, болҕомто, көх, булугас өй, доҕордуу сыһыан уо.д.а. сайдар. Тыйыс тымныылаах кыһыҥҥы уһун киэһээлэргэ өбүгэлэрбит оонньууларынан оонньуур олус табыгастаах.
Маннык тэрээһиннэр оҕону өбүгэ үгэһинэн иитии биир көрүҥэ буоларын чопчулуур. “Оонньуу барыбытын түмэр” этиинэн сиэттэрэн, барыгытын көхтөөхтүк дьарыктаныҥ, өбүгэ оонньуутун таптааҥ, сөргүтүҥ, бары бииргэ буолуохха диэн ыҥырабыт!
Тэрээһиҥҥэ сылын аайы күүс-көмө буолар биһиги Розалия Николаевнабыт оҕолоругар, бииргэ төрөөбүт балтыгар Анисия Николаевнаҕа улахан махталбытын биллэрэбит.
Светлана Аммосова, Танда бөһүөлэгин “Кэнчээри” уһуйаан бас иитээччитэ