Бүгүн улуус баһылыга Василий Аммосов, баһылыгы бастакы солбуйааччы Илья Артамонов, улуус депутаттарын сэбиэтин бэрэссэдээтэлэ Иннокентий Аммосов Байаҕантай нэһилиэгэр үлэлээтилэр.
Бастаан Арассыыйа Үлэҕэ Дьоруойа Михаил Готовцев олорор, үлэлиир алааһыгар сылдьан Михаил Николаевиһы кытта көрүстүлэр. Хаһаайыттар дьиэлэригэр, гаражтарыгар, хотонноругар автономнай гаас кииллэрбит сонуннарын үөрэ-көтө кэпсии тоһуйдулар. Салайааччылар Арассыыйа Үлэҕэ Дьоруойун кытта атах тэпсэн олорон улууска тыа хаһаайыстыбатын сайыннарар соруктаах суолу ырыттылар.
Салгыы Арассыыйа Дьоруойа Алексей Неустроев дьиэтигэр сылдьан ититии боппуруоһун тула кэпсэттилэр. Василий Иванович «Газгольдер» тэрилтэни кытта үлэлэһэн, дьиэлэрин гааһынан ититэр ньыманы туһаналларыгар этии киллэрдэ. Баһылык бу быдан түргэн уонна көдьүүстээх ньыма буолуоҕун эттэ. Онуоха Неустроевтар олорор уулуссаларын олохтоохторун кытта көрсөн кэпсэтии эмиэ тэрилиннэ. Ол курдук бу уулусса үрэх нөҥүө кырдалга тэйиччи сытар буолан, ДьУоКХ бу түөлбэҕэ ититии ситимин тардара өтөрүнэн кыаллыбат дьыала буоларынан, быйыл 20 ыалга эмиэ автономнай гаас киириэн сөбүн туһунан кэпсээтилэр эрээри сүрүн боппуруос гааһы холботуу төлөбүрүн уйунууга турда. Холобур, биир дьиэҕэ бу систиэмэни туруоруу ортотунан 700 тыһ. солк. тэҥнэһэр.
Маныаха Василий Иванович улуус дьаһалтатын өттүттэн биирдии ыалга 150 тыһыынча көмө үбүлээһин көрүөхтэрин, ону тэҥэ бааннар нөҥүө чэпчэтиилээх кирэдьиит өҥөтүн кэпсэтэргэ үлэ барыаҕын туһунан иһитиннэрдэ. Онон олохтоохтор бу этиини сэҥээрэ, сэргэхсийэ иһиттилэр.
Үлэлиир бөлөх итиэннэ нэһилиэк иһинээҕи хаарбах туруктаах муосталары, уһуйаан дьиэтин өрөмүөнүн, хочуолунайы көрдүлэр-иһиттилэр, түмүккэ тэрилтэ салайааччыларын кытта баар кыһалҕалары тула кэпсэттилэр.
Мария Аргунова