М.Н. Готовцев аатынан Танда орто оскуолатын 30 үөрэнээччитэ алтынньы 20–29 күннэригэр Санкт Петербург уонна Москва куораттарга үөрэхтээһин тууругар сылдьан кэллиллэр.
Оҕолору кытта салайааччынан английскай тыл учуутала Ньургуяна Находкина уонна админстративнай-хаһаайыстыбаннай үлэҕэ дириэктэри солбуйааччы Улита Заболоцкая сырыттылар.
– Киэҥ хабааннаах, интэриэһинэй бырагырааманан сырыттыбыт. Ол курдук оҕолору Санкт Петербург, Москва үгүс кэрэ-бэлиэ миэстэлэринэн экскурсияларга сырытыннаран элбэҕи биллилэр-көрдүлэр, үрдүк үөрэх кыһаларын билиһиннэрдибит. Онон сынньалаҥы кытта дьүөрэлээн бэртээхэй үөрэтэр-биллэрэр тур буолла.
Бу айаммытын тэрийэргэ биһиэхэ «Саха-Питер Тур» ХЭТ генеральнай дириэктэрэ Туяра Морозова уонна бу тэрилтэ үлэһитэ Виктор Томскай, Дьокуускайдааҕы бэрэстэбиитэлэ Галина Васильева, Москватааҕы бэрэстэбиитэлэ Родриго Брага Перейра Янхез күүс-көмө буоллулар. Ону таһынан оскуолабыт салалтатыгар уонна төрөппүттэргэ улахан махталбытын тиэрдэбит, – диэн Ньургуяна Находкина кэпсээтэ.