И.С. Портнягин аатынан Сыырдаах орто оскуолатын үөрэнээччилэригэр самаан сайыны айхаллаан Арассыыйаҕа Дьиэ кэргэн, Саха сиригэр Оҕо саас, улууспутугар Аҕа сылыгар олоҕуран төлкөлөөх ыһыах түһүлгэтэ Туолай алааска тэрилиннэ. Ытык өбүгэлэрбит төрүттээбит сиэрдэрин-туомнарын тутуhан, алгыстаах тылларынан мустубут дьону оскуола уруһуйга учуутала Василий Андросов уруйдаата-айхаллаата. Ыһыах арыллыытыгар эҕэрдэ тылы оскуола дириэктэрэ Иван Портнягин эттэ.
Самаан сайын салаллыбыт үөрүүтүн көрсө “Таптыыбын төрөөбүт дойдубун” диэн оҕолорбут ыһыахтарын учууталлар түмсүүлэрэ сахалыы эҕэрдэ үҥкүүнэн үөрэ-көтө саҕалаатылар. Оҕо саргылаах ыһыаҕар өрөгөй үҥкүүлүүр күнэ үүнэн, талаан арыллар кэмэ кэлэн, ырыа аргыстаах, дьиэрэҥкэй тойуктаах дэлэй ыһыах тардылынна. Олус истиҥ тэрээһин Сомоҕолоһуу оһуохайынан түмүктэннэ.
Кылаастар икки ардыларыгар сүһүөҕүнэн аттаран ыытыллар култуурунай күрэстэр ыытылыннылар. Үөрэнээччилэри саха төрүт культуратыгар сыһыарар уонна саха үгэһин киэҥ эйгэҕэ тарҕатар сыаллаах “Бастыҥ түһүлгэ – төрүт үтүө үгэспит” түһүлгэ көрүү күрэһэ, “Кэрэчээнэ Куо” кыргыттарга аналлаах уһун суһуох күрэһэ, “Сахам маанылаах таҥаһа” бастыҥ сахалыы таҥаһы көрүү.
Ыһыах иккис чааһыгар “Майаҕатта оонньуулара” спортивнай күрэхтэһиини физкультура учуутала С.В. Румянцев, нэһилиэк булчуттарын түмсүүтүн салайааччыта В.И. Копырин, ДЮСШ филиалын тустууга тренерэ В.Н. Антонов, гиирэҕэ тренерэ А.М. Гоголев сыаналаатылар. Спортивнай күрэхтэһиибит алын, орто, үрдүкү сүһүөх уолаттарыгар сахалыы көрүҥнэргэ (многоборье) ыытылынна.
Бу күрэх түмүгүнэн уолаттарга сүһүөхтэринэн: 1 миэстэ – “Эр Хоһуун” үрдүк аат сымса, кус быһый уолга, 2 миэстэ – “Дуолан Бөҕө” үрдүк аатын сымса, күүстээх, иҥиирдээх уолан, 3 миэстэ – “Сэргэх Уолан” үрдүк аатын булугас өйдөөх уол тигистэ. Хас биирдии түһүмэххэ бастыҥнары көрөн анал аат иҥэрилиннэ.
Күрэхтэһиини спонсордаатылар: Ил Түмэн депутата Иван Данилов, Аан дойду мас тардыһыыга 4 төгүллээх чөмпүйүөнэ Дмитрий Попов, Бэрт Ууһун нэһилиэгин баһылыга Илья Ильин, улуустааҕы үөрэх үлэһиттэрин идэлээх сойууһун председателэ Анна Попова, ИП Дьулустаан Охлопков, нэһилиэк булчуттарын түмсүүтүн салайааччыта Василий Копырин, А.П. Иванов аатынан «Айылгы»СК, улуустааҕы саахымат федерациятын председателэ Яков Колодезников, Е.Ф. Габышев аатынан ДЮСШ дириэктэрэ Михаил Слепцов, улуустааҕы ох саанан ытыыга федерациятын председателэ Ольга Попова, улуустааҕы чэпчэки атлетика федерациятын председателэ Сергей Нафанаилов, улуустааҕы хапсаҕай федерациятын председателэ Наум Ермолаев, нэһилиэк хапсаҕайдьыттарын түмсүүтүн салайааччыта Василий Шепелев, гиирэ спордун тренерэ Алексей Гоголев.
Оскуолабыт алын сүһүөх кылаастарыттан алта уол кытынна. Уопсай түмүккэ 4-с кылаас үөрэнээччитэ Явловскай Талбан муҥур кыайыылааҕынан таҕыста уонна оскуола туруорбут спортивнай велосипедынан наҕараадаланна.
Улуустан кыттааччылардаах орто сүһүөххэ биэс уолтан бастыҥынан Арыылаахтан 8-с кылаас үөрэнээччитэ Исаков Денис муҥур кыайыылааҕынан тахсан, эмиэ оскуола аатыттан спортивнай велосипедынан наҕараадаланна.
Өрөспүүбүлүкэттэн кыттааччылаах үрдүкү сүһүөххэ 12 уол кытынна. Манна аҕыс көрүҥҥэ илин-кэлин түсүһэн муҥур кыайыылааҕынан Гребенщиков Борис (МЮГ, 11-с кылаас) ааттанна уонна спонсор Иван Данилов туруорбут спортивнай велосипедынан наҕараадаланна.
Күрэхтэһии кыттыылаахтарыгар спонсордарбыт олохтообут сыаналаах бириистэрин оскуола дириэктэрэ И.Г. Портнягин үөрүүлээх-быһыыга майгыга туттарда. Оскуолабыт ыһыаҕын тэрийэн ыытыыга күүс-көмө буолбут дьоммутугар оскуола салалтатын аатыттан махталбытын тиэрдэбит.
Ньургуяна Хорунова, Сыырдаах орто оскуолатын иитэр үлэҕэ дириэктэри солбуйааччы