Сылы сэргэхтик саҕалаатыбыт

II-с Лөгөй нэһилиэгэр, Тулунаҕа, аҕа баһылыкпыт П.Е. Бурнашев 2025 сылы Бэтэрээн сылынан биллэрбитэ. Эрдэттэн былааннанан, саҥа сылбытын сэргэхтик саҕалаатыбыт. Ол курдук, Уһун Күөлгэ үс нэһилиэк бэтэрээннэрин көрсүһүүтүгэр тэринэн-хомунан, кыттыыны ыллыбыт. Бары күрэскэ көхтөөхтүк кыттан, астынан кэллибит.

Баһылыкпыт Петр Егорович Дьокуускай куоракка олорор тыыл, үлэ бэтэрээнин, ытык кырдьаҕаспытын Иван Гаврильевич Троевы 95 сааһынан  дьиэтигэр эҕэрдэлээн, Эҕэрдэ суругу, сэмэй бэлэҕин туттаран ааста. Иван Гаврильевич үөрэн-астынан, хардатын махтал тылын эттэ.

“Сайдыы” Сынньалаҥ киинигэр нэһилиэк бэтэрээннэригэр аналлаах Саҥа сылы көрсөр үөрүүлээх киэһэни тэрийдибит. Тэрээһини баһылыкпыт эҕэрдэ тылынан саҕалаата.

Мүрүттэн “Күндүүнэ” түмсүү улахан бөлөҕө сэргэхситтэ. Кэлэр кэскилбит, кэнчээри ыччаппыт, сиэннэрбит ыллаан, үҥкүүлээн, хоһоон ааҕан, бэйэлэрин эҕэрдэлэрин тиэртилэр, киэһэбитин киэргэттилэр.

Дьэ, онтон араас күрэстэр, маскарааттар, Чысхаан Хаарчаанатыныын киэһэни силигин ситэрдилэр.

Сынньалаҥҥа урукку сойуус саҕанааҕы харыйа оонньуурдарын, Саҥа дьыллааҕы аккырыыккалары коллекционер кыргыттар көрдөрүүгэ туруоран, дьон биһирэбилин ыллылар.

Кэлбит ыалдьыттар остуол тула олорон итии чэй иһэн, кэпсэтэн, ыллаан, үҥкүүлээн, бары бэлэх тутан, астынан тарҕастылар.

Сылбыт саҥатыгар бэртээхэй киэһэни тэрийсибит кулууппут үлэһиттэригэр, көхтөөхтүк кыттыбыт нэһилиэкпит саастаах дьонугар, Мүрүттэн анаан тэринэн кэлбит “Күндүүнэ” бөлөххө махталбытын тиэрдэбит. Саҥа үүммүт сыл үчүгэйи эрэ түстээтин, бары чөл, дьоллоох буолуоҕуҥ, эйэлээх олох эргийдин диэн баҕа санаабытын этэбит.

Агафия ТАРАБУКИНА,

бэтэрээн сүбэтин салайааччыта, нэһилиэк дьокутаата.

Тулуна.