Биир дойдулаахпыт, уһулуччулаах политическай деятель Василий Васильевич Никифоров – Күлүмнүүр 1866 сыллаахха ыам ыйын 18 күнүгэр уруккунан Дүпсүн улууһугар Нэрэлики алааска төрөөбүтэ. Дьоно сэниэ ыалынан биллэллэр, аҕата Баһылай Никифоров – улуус суруксута киһи.
Аҕалара эрдэ өлөн, Василийы алта саастааҕар эмиэ улуус суруксутунан үлэлиир Даниил Охлопков иитэ ылбыт. Онон уолу үөрэххэ сыһыарбыта чахчы. Василий бастакы учууталларынан Дүпсүн улууһугар кэлэн олохсуйбут политсыылынайдар Н. Странден, П. Ермолов, Д. Юрасов уонна П. Подбельскай буолбуттара.
Үөрэхтэммит Василий Никифоров өйө-санаата тобуллан, бэлиитикэҕэ сыстан барар. Ол курдук 1906 сыллаахха сахалар сойуустарын тэрийэн, быраап туһугар киирсиитин саҕалыыр. Ону ыраахтааҕылаах Арассыыйа салалтата, биллэн турар, сөбүлээбэтэҕэ. Ол иһин хаайылларга уураахтанар. Онно да олорон самныбатаҕа, аны литератураҕа ылсан “Манчаары түөкүн” диэн драманы суруйар. Бу драматын “Саха кулууба” диэҥҥэ туруораллар. Хаайыыттан тахсан да баран, политическай охсуһуутун тохтоппот. Аны “Якутский край” хаһыакка Саха сиригэр холуобунай буруйдаахтары көскө ыытары бопсор туһунан ыстатыйаны суруйар.
Кинини 1927 сыллаахха конфедаралистар дьыалаларыгар соҥнооннор тутан хаайбыттара уонна 1928 сыллаахха суут уурааҕынан ытылларга ууруллан баран, ону уон сыл концлааҕырга ыытарга уларыппыттара. Василий Никифоров 1928 сыллаахха Новосибирскай куорат түрмэтин балыыһатыгар өлбүтэ. Үтүө аата 1992 сыллаахха ырааһырбыта.
Сүдү киһи, бөдөҥ политик, кыраайы үөрэтээччи, суруйааччы, публицист Василий Васильевич Никифоров –Күлүмнүүр аата сөҕүрүйбэт төлөн курдук сырдыы туруоҕа.
Афанасий Сектяев