Улуустааҕы нэһилиэнньэ дьарыктаах буолуутун киинэ Анал байыаннай дьайыы кыттыылаахтара уонна кинилэр дьиэ кэргэттэрин чилиэннэрэ үлэнэн урутаан хааччыллыыларыгар уонна идэни баһылааһыннарыгар анал бырагыраама нөҥүө үлэни-хамнаһы тэрийэр.
Анал бырагыраама сыалынан-соругунан байыаннай сулууспаттан тохтообуттары уонна кинилэр дьиэ кэргэттэрин чилиэннэрин үлэ ырыынагар конкуренцияны ааһалларыгар уонна идэни хааччаҕа суох булалларыгар аадырыстаах көмөнү оҥоруу буолар. Үлэни булууга үлэтэ суоҕунан учуокка турууну таһынан, саҥа табыгастаах идэни баһылааһыҥҥа эмиэ туһуланар. Нэһилиэнньэ дьарыктаах буолуутун киинин иһинэн маннык наадалаах идэлэргэ үөрэтии тэриллэр. Ол курдук, погрузчик суоппара, бульдозер, экскаватор машиниһа, слесарь. Анал байыаннай дьайыы кыттыылааҕын дьиэ кэргэнин чилиэнигэр “Медицинскэй сиэстэрэ”, “Предприниматель үлэтин төрүттэрэ”, “1С: Бухгалтерия” диэн бырагыраамаларга үөрэтии тэриллэр. “Демография” национальнай бырайыагынан Анал байыаннай дьайыы кыттыылаахтарын уонна кинилэр дьиэ кэргэттэрин кытта үлэлэһиэхтэрэ. Ол чэрчитинэн “Работа в России” диэн портал нөҥүө сайаапка ыытан үөрэниэхтэрин сөп.
“РФ нэһилиэнньэтин дьарыктаах буолуута” диэн РФ Сокуонугар олоҕуран, байыаннай сулууспа кыттыылаахтарыгар уонна кинилэр дьиэ кэргэттэригэр үлэни булууга ыарахаттары көрсөллөр диэн категорияҕа киирсэллэр. Манна кинилэргэ быстах үлэ миэстэтин эбэтэр атын сиргэ үлэ миэстэтин булуу эбэтэр көһүү, идэҕэ туһаайыы, психологическай сүбэ, көмө оҥоһуллар. Социальнай адаптация бырагырааматыгар кыттыахтарын сөп. Манна исписэлиистэр үлэ булар технологияҕа үөрэтиэхтэрэ. Маны тэҥэ, бэйэ дьарыктаахтар бырагыраамаларыгар кыттыахтарын сөп. Куонкурус түмүгүнэн бэйэ дьыалатын арыныыга 150 тыһыынча солкуобай субсидия ылыахтарын сөп.
Быһаччы көмөнү оҥороллор
Уус Алданнааҕы нэһилиэнньэ дьарыктаах буолуутун киинэ Анал байыаннай дьайыы кыттыылааҕын уонна кини дьиэ кэргэнин чилиэннэрин үлэнэн хааччыйыы итиэннэ анал идэҕэ туһаайар үөрэхтээһини олоххо киллэрии диэн анал дьаһалга олоҕуран, Мүрү нэһилиэгин олохтооҕо, элбэх оҕолоох, үлэтэ суох Л. диэн ийэ быйыл кулун тутарга кэлэн ыйыталаспыт.
Бу учуокка турар кэмин устата Дьарыктаах буолуу киинин үлэһиттэрэ киниэхэ судаарыстыбаннай өҥө курдук сөптөөх идэни булууга бэсиэдэ, тестирование нөҥүө идэҕэ туһаайыыны тэрийбиттэрэ.
Ситимнээх үлэ түмүгүнэн, аныгы элбэх хайысхалаах Академияҕа үөрэнэн “алын сүһүөх иитээччи” диэн идэҕэ ыам ыйыттан бэс ыйыгар диэри үөрэнэн, үөрэҕи бүтэрбитин туоһулуур докумуону тутта. Атырдьах ыйыгар элбэх оҕолоох ийэ Л. дьарыктаах буолан, бэйэ дьыалатын арынна.
Светлана Сивцева