Россия президенэ Владимир Путин СВО кыттыылаахтара ыччаты патриотическай иитиигэ кытталлара, биллэн турар, көдьүүстээх буолуоҕун бэҕэһээ 2023 сыл түмүктэрин таһаарар пресс-конференциятыгар эттэ.
Онуоха Аҕа дойду Геройдарын күнүгэр «Признание-2023» национальнай бириэмийэни тутан Москваттан дойдутугар кэлэн иһэр Курбуһах орто оскуолатын физкультураҕа учуутала, анал байыаннай дьайыы кыттыылааҕа Иван Петров бу курдук санаатын үллэһиннэ:
– Москваҕа сылдьар кэммэр ыччаты дойдуга бэриниилээх буолууга иитиигэ киэҥник кэпсэттибит. Сүрүн болҕомто байыаннай сулууспаҕа бэлэмнээһиҥҥэ уурулунна. Эһиилги үөрэх дьылыттан ОБЖ оннугар саҥа предмет киирэр буолла, «Основы безопасности и защиты Родины» диэн. Онно кадры бэлэмнээһин кэлэр сайынтан саҕаланыахтаах. Ол барыта урукку НВП чааһын ылыахтаах диэтилэр. Аны үөрэтиигэ учууталлар тиийбэттэринэн анал байыаннай дьайыы кыттыылаахтарын кытыннарыахтара баҕараллар да, хамнас боппуруоһугар кэккэ ыарахаттар баалларын эттилэр. Итини тэҥэ оскуолалар материальнай-техническэй базалара мөлтөҕө, онно болҕомто ууруллуохтааҕын ахтылынна. Онон дойдуга бэриниилээх буолууга иитиигэ уларыйыылар киирэр буоллулар.