Суотту нэһилиэгэр 20 дьиэҕэ айылҕа убатыллыбыт гааһынан ититии автономнай установкаларын туруорууну пилотнай бырайыак быһыытынан саҕалыырга СӨ Баһылыга Айсен Николаев сөбүлэҥин биэрдэ.
Улуус баһылыга Василий Аммосов кулун тутар 1 күнүгэр Ил Дархан аатыгар маннык автономнай установкалары туруоруон баҕалаах дьоҥҥо субсидиянан көмөлөһөргө сурук түһэрбитэ. Онон бу бырайыак олоххо киирэр буолбутун туһунан үөрүүлээх сонун кэллэ.
Маннык установканы биир ыалга туруорууга 600 000 солкуобай ороскуоттанар эбит буоллаҕына, 200 000 солкуобайа өрөспүүбүлүкэ бюджетыттан, 200 000 солкуобай муниципальнай бюджеттан төлөнүөҕэ, хаалбыт 200 000 солкуобайы дьиэлээх дьон бэйэлэрэ уйунуохтара.
Манан сибээстээн, кулун тутар 22 күнүгэр диэри СӨ Промгеологияҕа министерствотыгар гааһы киллэттэриэн баҕалаах дьону, аадырыстарын чуолкайдыырга уонна улуус бюжетыттан көрүллэр субсидия бэрээдэгин оҥорорго сорудахтанна.