Улууспутугар медицинаны төрүттээбит Илья Сухонин кый ыраах Санкт-Петербургтан кэлэн манна дьиэ-уот тэринэн, олохсуйан удьуорун тэниппитэ. Онон кини сиэннэрэ Томтортон тэнийэннэр билигин өрөспүүбүлүкэ араас муннуктарыгар олороллор.
Мин кинилэргэ эмиэ чугаспын диэххэ сөп. Ол эрээри ону анаан кэпсээбэппин, суруйуум улахан аҥаарын ылыа. Быһаччы Илья Михайлович удьуордарын билиһиннэриим. Кини кыыһа Мария манна кэлэн баран Томтор таҥаратын дьиэтин аҕабытыгар Сергей Еводович Дьячковскайга кэргэн тахсан аҕыс оҕоломмута: үс кыыс, биэс уол. Онон бу оҕолор бары Мүрү Томторугар төрөөбүттэрэ.
Улаханнара Мария төрөппүттэрин курдук медик идэлэммитэ. Кини сэбиэскэй-партийнай үлэһит Василий Прокопьевич Готовцевтыын ыал буоланнар биэс оҕоломмуттара. Кыргыттара Февралида почта сибээһигэр, Валентина медицина эйгэтигэр үлэлээбиттэрэ. Ермак полиграфист, оройуоннааҕы типография дириэктэринэн үлэлии сылдьыбыта. Июлий оройуоҥҥа биллэр музыкант, баянист этэ. Ян араас үлэлэргэ үлэлээбитэ. Дьэ, кинилэртэн сиэннэр медик идэтин баһылаабыттара. Ол курдук Ермак кыыһа Марина фельдшер, Июлий сиэнэ Валентина тиис бырааһа идэлээхтэр.
Иккис кыыс Августина үтүөлээх учуутал Георгий Афанасьев олоҕун аргыһа. Кинилэр сиэннэрэ Раиса фельдшер идэлээх.
Үһүс, төрдүс оҕолор Капитолина, Серафим игирэлэр. Капитолина Дьокуускай таһыгар Тулагыга олорбута. Оттон Серафим эһэтин Илья Михайлович араспаанньатын ылан Сухонин буолбута. Атыттар бары Дьячковскайдар.
Илья Сухонин сиэннэрэ
Оҕонньор сиэнигэр тоҕо бэйэтин араспаанньатын бэрдэрбитэ туспа остуоруйа. Ол курдук Илья Михайлович соҕотох уоллааҕа Евгений 1920 сыллаахха Дьокуускай куоракка буолбут дьалхааҥҥҥа түбэһэн ытыллыбыта. Ол иһин ааппын ааттатар киһитэ суох хааллым диэн сиэнин бэйэтин аннынан суруттарбыт. Онон Сухонин диэн арааспанньа сүппэккэ тэнийэн баран иһэр. Бу Серафим бэтэринээр идэлээх этэ. бэйэтин курдук бэтэринээр идэлээх. Өлүөхүмэттэн төрүттээх Ефросиния Сектяеваны кэргэн ылан биэс оҕоломмуттара. Кинилэр үс сиэннэрэ медик идэлээхтэр. Ол курдук Наташа медсиэстэрэ, Юля акушерка идэлээхтэр. Иккиэн медкииҥҥэ үлэлииллэр. Уол сиэннэртэн соҕотоҕун медик идэтин баһылаабыт Серафим зуботехник.
Евгений, Сергей атын уобаластарга олохсуйбуттара. Туох-ханнык оҕолордоохторун билбэппин. Онтон Иннокентийдаах, Пантелеймон Аҕа дойду сэриитин кыттыылаахтара. Пантелеймон кыргыһыы толоонугар охтубут, Иннокентий сэрииттэн кэлэн баран уһаабатах, бааһырыытыттан өлбүт.
Онон Сухонин биэлсэр удьуордара бэһис көлүөнэҕэ тиийэ медик идэтин баһылааннар өрөспүүбүлүкэ араас муннуктарыгар үлэлии сылдьаллар.
Афанасий Копырин