Балаҕан ыйын 4 күнүгэр Россияҕа Үлэ Героя Михаил Готовцев аатынан Танда оскуолатын оҕолоро, үлэһиттэрэ уонна төрөппүттэрэ күргүөмүнэн оскуола оҕуруот олордор учаастагар субуотунньукка тахсан көхтөөхтүк үлэлээтилэр.
Бу күн учаастак оҕо көрдөөх саҥатынан туолла. Уолаттар уонна оскуола эр дьоно хортуоппуйу хостоон биэрбиттэрин, кыргыттар уонна учууталлар хомуйдулар. Кыра кылаас оҕолоро учууталларын салалталарынан хомуллубут хортуоппуйу ыраастааһыҥҥа, кууллааһыҥҥа сырыттылар. Куулламмыт хортуоппуйу эр дьон тыраахтарынан оскуолаҕа таһан тарҕата кутта.
Оскуола повардара Елена Андросова уонна Мария Софронова минньигэс лэпиэскэнэн уонна отон муорсунан күндүлээтилэр.
Маннык субуотунньуктарга оҕолор кыттан, кыра эрдэхтэриттэн үлэлии, бэйэ-бэйэлэригэр көмөлөсүһэ, түмсүүлээх буоларга үөрэнэллэр. Маныаха төрөппүттэр тэҥҥэ сылдьыһан, холобур буоллулар.
Анна Алексеева, оскуола үлэһитэ.