Уус Алданнааҕы оҕолорго аналлаах социальнай-реабилитационнай киин (дир. Иннокентий Сергеев) сайыҥҥы үлэтин түмүктүүр улахан тэрээһинэ атырдьах ыйын 11 күнүгэр үрдүк таһымҥа буолан ааста. Саха Өрөспүүбүлүкэтин Үлэҕэ уонна социальнай сайдыыга министиэристибэтин бирикээһигэр олоҕуран сайын устата оҕону тэрээһиннээх сынньалаҥынан хабыы үлэтэ быллааннаахтык ыытыллыбыт.
Ол курдук бу тэрилтэ төрөппүттэри кытары үлэлэһэн өрөспүүбүлүкэтээҕи «Виктория» лааҕырга 20-чэ оҕону тэрийэн ыыппытын уонна тэрилтэ баазатыгар үс сезонунан «Кустук» сайыҥҥы дьарыктаах буолуу былаһааккатыгар 21-дии күн 10-нуу оҕону хабан ситиһиилээхтик үлэлээбитин бу тэрээһин толору көрдөрдө.
Тэрилтэни кытары бииргэ үлэлэһэр социальнай партнердар кыттыыны ылбыттара кэрэхсэбиллээх: ыччат отдела, психологическай киин, киин балыыһа, ис дьыала отдела, оҕо бибилэтиэкэтэ. Кинилэр оҕолор үөрүүлэрин тэҥҥэ үллэстээри, ситиһиилэрин көрөөрү бары үлэлэриттэн быыс булан кэлбиттэригэр реабилитационнай киин үлэһиттэрэ истиҥник махтаннылар.
Инники икки сезоҥҥа сылдьыбыт оҕолорго түмүк тутатына оҥоһуллан испит, онон бу тэрээһиҥҥэ бүтэһик үһүс сезон оҕолоро ыалдьыттарга анаан ыллаан, үҥкүүлээн көрдөрбүттэрэ уонна бу былаһааккаҕа сылдьан тугу олус сөбүлээбиттэрин, туохха үөрэммиттэрин ис санааларыттан эппиттэрэ олус долгутуулаах түгэн буолла. Сезоннар салайааччыларынан үс социальнай педагог ананан үлэни кыһаллан тэрийбиттэрэ көһүннэ.
Иитээччилэр, психолог, медик күннэтэ сэттэ хайысханан араас дьарыктары, трениннэри, көрсүһүүлэри, экскурсиялары, күрэхтэри тэрийбиттэрин туһунан отчуот оҥоһулунна. Ол түмүгүнэн иитиллээччилэргэ анал ааттар иҥэриллэн туттарылыннылар. Оҕолор барахсаттар элбэх киһи иннигэр ааттара ааттанан, илиилэригэр туоһулуур суругу, коллаж-хаартысканы уонна бэлэх-оонньууру тутан олус үөрдүлэр.
Ыалдьыттар биир улахан үлэ түмүктэммитинэн эҕэрдэлээн, ситимнээх үлэ иһин махтанан туран специалистар салгыы оҕону кытары туһаналларыгар тэрилтэҕэ дохсун ытыс тыаһын доҕуһуолунан бэйэлэрин бэлэхтэрин туттардылар, уустук үлэҕэ ситиһиини, өрүү бииргэ буолууну баҕардылар.
Светлана Бурцева, уопсас. кэрэсп.