Соҕотох уолун сүтэрбит аҕа байыаннай дьайыыга саха быһахтарын оҥорон ыытта

Байыаннай дьайыыга сырдык тыынын толук уурбут байыас аҕата Александр Горохов байыастарга көмөлөһөр санааттан биэс саха быһаҕын уонна дрону тутар үс сиэккэни оҥорон «Якутия с тобой» уопсастыбаннай хамсааһын ыстаабыгар тиксэрдэ.

Чэриктэй нэһилиэгин олохтооҕо Александр Горохов 1966 сыллаахха Чэриктэйгэ төрөөбүт, 1985 сыллаахха Мүрү 1-гы №-дээх орто оскуолатын бүтэрэн, 1987 сыллаахха аармыйаҕа сулууспалаан кэлбит. Онтон 2000 сылга диэри Чэриктэй оскуолатыгар физкультура учууталынан үлэлээбит. Ыарытыйар буолан үлэтиттэн тохтоон, бронха астматынан 2005 сыллаахха III группалаах инбэлииккэ тахсан биэнсийэҕэ олорор. Кини 1997 сыллаахха Майаҕастан төрүттээх түөрт оҕолоох Агафья Дмитриевалыын олохторун холбоон, 1998 сыллаахха уол оҕолонон, Александр Дмитриевич аҕа буолар дьолун билбит.

Айаал Горохов вахтанан үлэҕэ сылдьан бастакы хомуурга бэбиэскэ тутан, байыаннай дьайыыга барбыт уонна ааспыт сыл күһүнүгэр сэтинньигэ сырдык тыына быстыбыт.

Суос-соҕотох уолун сүтэрбит аһыылаах Александр Дмитриевич оҕотун туһунан кылгастык маннык ахтар:

– Уолум Айаал оҕоттон туох да уратыта, чорбойоро суох этэ. Оҕо-оҕо курдук дойдутун кэрэ айылҕатыгар көҥүл көччүйэн улааппыта. Куруук элбэх доҕордоох буолара. Наһаа элэккэй майгылааҕа, дьоҥҥо үчүгэй сыһыаннаҕа, ол иһин дьон киниэхэ тардыһарын бэлиэтии көрөн сэмээр үөрэрим. Оскуолатааҕы кэмигэр мээчигинэн, тенниһинэн үлүһүйэн спорка дьулуһара. Тыа сирин оҕотун сиэринэн эр киһи үлэтигэр-хамнаһыгар сыстан улааппыта.

Оскуоланы бүтэрэн баран аармыйаҕа сулууспалаан кэлбитэ. Сыбаарсык идэтигэр үөрэммитэ. Тоҕо эрэ үрдүк үөрэххэ санаммат этэ, эр киһи дьаныстаҕына хара үлэнэн даҕаны айаҕын ииттинэр диэн санаалааҕа. Ол курдук, хас да сыл вахтанан үлэлээбитэ. Ол үлэлии сылдьан биир күн «бэбиэскэ туттум» диэн сүрэхпитин хамсаппыта. Чугас дьоно бары «барыма, тугу эмит тобулан көрүөххэ» диэн этэ сатаабыппытын, төлөбүрдээх үрдүк үөрэххэ да киллэрэ сатаабыппыт үрдүнэн, «кэбис, хайдах куота сылдьыахпыный? Аҕа дойдубун көмүскүү барабын» диэн бигэтик эппитэ. Онно истэн, «оҕом Аҕа дойдутун туһугар туруулаһар киһи буолбут эбит ээ» диэн эмиэ да киэн тутта санаабытым…

Ити курдук күн-дьыл ааһан испитэ. Ааспыт сыл ыам ыйыгар уоппускаҕа кэлэ сылдьыбыта. Онно эмиэ «хайдах эмит гынан хаал» диэн көрдөһөн көрбүппүт. Онуоха «барабын», «уолаттарым» диэн тыллаах этэ. Ол курдук уолаттарыгар быһах кэһиилэнэн төттөрү барбыта.

Кэлин олохтон барарын билбит курдук, саҥата аҕыйаабыта, санаата түспүт курдуга, куруук быраһаайдаһар курдук саҥарара. Төһө да оҕобун аһыйдарбын, аны кэлэн хайыамый? Оҕом куруук байыаннай дьайыыга бииргэ сылдьар уолаттарын саныыра, кыайыы-хотуу кэлэ охсуон баҕарара диэммин, байыаннай дьайыыга бэйэм тугу кыайарбынан көмөлөһөргө сананным.

Бу оҥорбут быһаҕым биир да саллаат олоҕун быыһаатаҕына оҕом санаатын ситиһэргэ көмөлөспүт курдук сананыам этэ. Оҕом Айаал бу дойдубут чиэһин көмүскүүргэ төһөлөөх санаатын уурбута, төһөлөөх уустук түгэннэри, кэмнэри ааспыта буолуой? Онон оҕом эр киһи буолан ытык иэһин чиэстээхтик толордоҕо эрэ диэн санаабын уоскутунабын.

Александр Дмитриевич нэһилиэгэр интэриниэт ситимэ киириэҕиттэн, 2020 сылтан, ютуб ханаалга көрөн үөрэнэн уонна Хомустаахха олорор Михаил Ховров диэн уустан ыйыталаһан, 2021 сылтан кыралаан саха быһаҕын чочуйан дьарыктанар.

Ити курдук, байыаннай дьайыыга олохторун толук уурбут уолаттарбыт төрөппүттэрэ, чугас дьонноро кыайыы иһин ис сүрэхтэриттэн баардарынан-суохтарынан байыаннай дьайыыга сылдьар байыастарга көмөлөһөллөрүн бэлиэтии көрөбүт.

Мария АРГУНОВА