Куйаар ситимин нөҥүө тэйиччиттэн ыытыллар түөкүннээһинтэн (дистанционнай мошенничество) улуус олохтоохторун сэрэтэр туһугар Россия ИДьМ Уус Алданнааҕы отделын үлэһиттэринэн үгүс үлэ тиһигин быспакка ыытыллан кэллэ. Ол курдук, бу күннэргэ холуобунай ирдэбил бөлөҕүн оперуполномоченнайдара улуус тэрилтэлэрин кэрийэ сылдьан, дьон түөкүннээһиҥҥэ киирэн биэрбэтин туһугар араас холобурдаах лекциялары аахтылар, ону тэҥэ дьоҥҥо сэрэтэр хайысхалаах буклеттары түҥэттилэр.
Бу хамсааһыҥҥа улуус 15 тэрилтэтэ хабылынна, уопсайа 500-кэ кэриҥэ киһи лекцияны иһиттэ. Төһө да маннык үлэ күүскэ ыытылларын үрдүнэн, улууспутугар сыл иһигэр түөкүттэр дьайыыларыттан алта холуобунай дьыала тэрилиннэ. Улуус олохтоохторун албыҥҥа киллэрэн, өйдөрүн-санааларын сүүйэн, бэйэлэрин счеттарыгар сыппыт бас билэр харчыларын түөкүттэр счеттарыгар ыытыыларын түмүгэр тэриллибит холуобунай дьыалалар күн бүгүн кыайан арыллыбакка тураллар, онон силиэстийэ үлэтэ салгыы ыытыллар.
Билиҥҥи сайдыылаах кэмҥэ түөкүттэр дьону албынныырга араас ньыманы тутталлар. Ол курдук, кинилэр уопсай базаҕа көрөннөр, ким ханна олорорун, тугу үлэлиирин билиэхтэрин сөп. Холобур, соторутааҕыта почта үлэһитигэр гр. С диэн киһиэхэ телефонунан эрийбиттэр: «Главпочтамтан эрийэбин, эн тэрилтэҥ базатыгар саҥардыы оҥоруохпутун наада», – диэн албыннаан, тэрилтэ дааннайдарын ыланнар, бэйэлэрин тылларыгар киллэрэннэр, өйүн-санаатын баайаннар, тэрилтэ счетугар сыппыт 49 112, 14 солкуобай харчытын бэйэлэрин счеттарыгар ыыттардылар. Маны таһынан Бороҕон сэлиэнньэтин олохтоохторугар билэр дьоннорун ааттарыттан «WhatsApp» мессенджер нөҥүө сурук суруйаннар, иэс харчы көрдөөбүттэр. Онуоха бу дьон бэйэбит билэр киһибитигэр харчы иэс ыытабыт дии санааннар, холбоон 60 000 солкуобайы түөкүттэр счеттарыгар ыытан кэбистилэр.
Итинник түгэннэр тахса тураллар. Ол курдук сыл устата биһиги улууспут олохтоохторо 11 ый түмүгүнэн албыҥҥа-көлдьүҥҥэ киирэн, өйдөрүн-санааларын сүүйтэрэн, 703 000 солкуобайы түөкүттэргэ ыыттылар.
Манан сиэттэрэн Россия ИДьМ Уус Алданнааҕы отдела улуус дьонун-сэргэтин түөкүттэртэн сэрэхтээх буоларгытыгар, билбэт нүөмэргититтэн эрийдэхтэринэ телефоҥҥутун ылбаккытыгар, интернет маҕаһыын нөҥүө сакаас оҥороргутугар булгуччу сэрэхтээх буоларгытыгар, счеккутугар элбэх харчыны ууран сытыарбаккытыгар баҕарабыт. Эһиэхэ хаһан даҕаны баан үлэһиттэрэ, полиция сотрудниктара бэйэлэринэн эрийэн, «эн түөкүттэргэ түбэһэн эрэҕин» диэбэттэр, билбэт киһигит эрийдэҕинэ сибээһи олохтообоккут туһунан сэрэтэбит.
Александр Березкин, Россия ИДьМ Уус Алданнааҕы отделын старшай оперуполномоченнайа, полиция капитана