Саҥа дьыл чугаһаатар чугаһаан иһэр. Сүпсүлгэн, кэлии-барыы үксээтэ. Оттон оҕолорбут Тымныы Оҕонньорго сурук суруйан, баҕа санаа оҥостубут бэлэхтэрин ылаары күүтэ сырыттахтара. Улууспут оҕолоруттан Саҥа дьыл үүнэр түүнүгэр Тымныы Оҕонньортон туох бэлэҕи көһүтэллэрин ыйыталастыбыт. Аныгы кэм оҕолоро туох бэлэҕи эрэйэр эбиттэрий?
Карина Аргунова, Тиит Арыы сүрүн оскуолатын 6-с кылааһын үөрэнээччитэ:
– Күүтүүлээх саҥа сылбыт үүнэрэ аҕыйах күн хаалла. Үгэс курдук Тымныы Оҕонньорго сурук суруйбутум. Баҕа санаам – билисэпиэт. Тымныы Оҕонньор көрдөһүүбүн куруук толорооччу, саамай үчүгэй бэлэҕэ 3Д уруучука этэ.
Сайнаара Гуляева, Уһун Күөллээҕи «Чуораанчык» уһуйаан бэлэмнэнии бөлөҕүн иитиллээччитэ:
– Мин саамай сөбүлүүр бырааһынньыгым Саҥа дьыл! Саҥа дьылы наһаа күүтэбин, Тымныы Оҕонньорго ийэбинээн сурук суруйбуппут, ийэм илдьэн почтаҕа укпута. Сурукпар «Бэби борн» диэн памперстаах оҕо (куукула) сакаастаабытым, өссө эдьиийин эмиэ сакаастаабытым, баҕар эдьиийэ суох буолуон эмиэ сөп диэбитим. Тымныы Оҕонньор мин баҕа санаабын куруук толорор, ол иһин сыл аайы ийэбинээн сурук суруйан ыытабыт.
Арчылаан Ядрихинскай, Баатаҕайдааҕы «Күнчээн» оҕо саадын иитиллээччитэ, алта саастаах:
– Мин Тымныы Оҕонньорго уруһуйдаабытым. Киниттэн тугу көрдөспүппүн эппэппин, эттэхпинэ туолбат ээ. Миэхэ Тымныы оҕонньор ааспыт сылларга «Лего» конструктор уонна массыына биэрбитигэр олус үөрбүтүм.
Савелий Лугинов, Бэйдиҥэ орто оскуолатын 2-с кылааһын үөрэнээччитэ:
– Мин Тымныы Оҕонньорго куруук суруйааччыбын. Быйыл да сурук суруйан почтаҕа илдьэн укпутум. «Аirpods» диэн провода суох наушник бэлэхтииригэр көрдөспүтүм. Тымныы оҕонньор куруук көрдөһүүбүн толорон үөрдээччи. Саамай үчүгэй бэлэҕим суотабай төлөпүөн этэ.
Аня Константинова, Мүрү 2-с №-дээх орто оскуолатын 4-с кылааһын үөрэнээччитэ:
– Мин Тымныы Оҕонньорго сурук суруйа иликпин, суруйуом этэ. Сурук суруйан, уруһуйдаан харыйабар уурааччыбын. Урут наар оонньуур көрдөһөөччүбүн, куруук толорор этэ. Быйыл планшет көрдөһөр санаалаахпын. Саҥа дьыл наһаа үчүгэй, элбэх баҕа санаа туолар, үгүс үөрүүнү бэлэхтиир.
Айсен Бурцев, Сыырдаах орто оскуолатын 2-с кылааһын үөрэнээччитэ:
– Тымныы Оҕонньорго сурук суруйбутум. «Оculus 2» диэн ачыкы (гарнитура виртуальной реальности) бэлэхтээ диэн көрдөспүтүм. Кэлэр сылга чугас дьонум бары доруобай, дьоллоох буоллуннар диэбитим. Тымныы оҕонньор баҕа санааны толорор. Миэхэ төлөпүөнүм суох эрдэҕинэ Poco диэн төлөпүөн бэлэхтээбитэ. Саамай үчүгэй бэлэҕэ элбэх оонньуурдаах черепашка-ниндзя нобуора этэ.
Мария Аргунова