Улуус баһылыгын солбуйааччы Анатолий Сторожев, үөрэхтээһин уонна култуура салалталарын начаалынньыктара Степан Литвинцев, Сергей Нафанаилов уонна “Өркөн” эбии үөрэхтээһин киинин дириэктэрэ Яков Колодезников 2-с Лөгөй нэһилиэгэр тэрилтэлэр үлэлэрин-хамнастарын билсэ сырыттылар. Саҥа салалта бу күннэргэ улуус нэһилиэктэрин олоҕун билсэр соруктаах үлэлиэҕэ.
Көрсүһүүгэ уһуйаан сэбиэдиссэйэ Аксинья Бурнашева, оскуола дириэктэрэ Федот Бысыин баар кыһалҕалары билиһиннэрдилэр, ону туоратарга ханнык үлэлэр ыытыллыахтарын наадата ырытылынна. Степан Литвинцев маҥнайгы учууталыгар Татьяна Дегтяреваҕа улуус бочуотунай грамотатын итиэннэ оскуола баазата хаҥыырыгар 50 тыһ. солкуобай суумалаах сертификаты туттарда.
Тулуналар кулууба суох олорбуттара иккис сылыгар барда. 1985 сыллааҕы тутуу хаарбах туруктаах да буоллар, олохтоохтор туруорсууларынан ититиитэ бэриллэн капитальнай өрөмүөн үлэтэ ыытылла турар. Маны сэргэ кулууп саҥа дьиэтин бырайыактыыр үлэ түмүктэниэхтээҕин дириэктэр Наталья Гоголева иһитиннэрдэ. Оттон өрөмүөн үлэтэ ахсынньыга бүтэн, Саҥа дьылы көрсө үлэҕэ киириэҕин эттэ. Маны сэргэ библиотека дьиэтин ититии үлэтэ түмүктэнэн эрэр эбит. Сэбиэдиссэй Александра Дегтярева бара турар үлэни-хамнаһы, үлэ былаанын билиһиннэрдэ.
Наталья Попова