Олунньу 17 күнүгэр Саха сиригэр Пионерия тэриллибитэ 100 сыла буолар. Пионердар диэн кимнээҕий? Кинилэр тугунан дьарыктаналлар этэй? Ону билээри биһиги пионербаһаатай Анна Бурнашеваҕа бара сырыттыбыт. Анна Прокопьевна Дүпсүн орто оскуолатыгар ааспыт пионерскай оҕо сааһын, баһаатайынан үлэлээбит сылларын ахтан-санаан ааста.
Советскай союз саҕана хас биирдии оскуолаҕа пионерскай дружиналар бааллар эбит. Дружинаны пионер баһаатай салайара. Дружина активнай пионердары мунньан дружина сэбиэтэ диэн тэриллэрэ. Хас биирдии кылаас – туспа пионерскай этэрээт диэн буолара. Пионерга 3 кылааска үчүгэй үөрэхтээх, актыыбынай оҕолору ылаллара. 1 кылааска үөрэнэр оҕолор октябреноктар диэн буолаллара. Пионердар учууталларга көмөлөһөн, кыра кылаас оҕолоругар араас оонньуулары, тэрээһинэри тэрийэллэрэ. Кинилэр баһаатайдар диэн ааттаналлара.
Анна Прокопьевна кыра кылааска үөрэнэ сылдьан октябрятскай группаҕа баһаатайдаабыт. Онтон үрдүкү кылааска тахсан баран октябрятскай группалар баһаатайдарын салайааччытынан үлэлээбит. Оскуоланы бүтэрэн баран, комсомол путевкатынан Мүрү орто оскуолатыгар пионербаһаатайынан биир сыл үлэлээбитин кэннэ директора Иван Николаевич Данилов үөрэххэ ыыппыт.
Дьокуускайдааҕы педагогическай училищены бүтэрэн баран, Тулунаҕа, Хомустаахха детсад сэбиэдиссэйинэн, онтон Дүпсүн орто оскуолатыгар физкультура учууталынан, пионербаһаатайынан үлэлээбит. Онно оҕолор араас омук оҕолорун кытта суруйсаллар эбит, оскуолаларыгар туох үлэ барарын, Саха сирин туһунан, оройуон туһунан барытын суруйаллара, буочардара тупсара, билиилэрэ-көрүүлэрэ кэҥиирэ диэн кэпсиир Анна Прокопьевна.
Анна Прокопьевна 1976-1980 сс. Пионердар дьиэлэрин директорынан үлэлиир сылларыгар пионердар дьиэлэрэ 5 хайысханан үлэтин ыытара. Пионерскай, комсомольскай актив школатын үлэлэтии, «Искра» пионер баһаатайдарын этэрээттэрин кытта үлэ, пионерскай дружиналар үлэлэрин координациялааһын, «Албан аат», «Ленинскэй Хостору» тэрийии, үлэлэтии, оҕо хаһыаттарын, сурунаалларын нөңүө үлэни тэрийии.
Республикаҕа бастакынан Пионердар дьиэлэрин күннэрин ыытыыны тэрийбиттэр. Ол улахан сэңээриини ылан, үлэлэрин опыта республикаҕа тарҕаммыта. Юнкорскай постар үлэлэрин көҕүлээн, суруйааччылары кытта көрсүһүү тэрийэн, илиинэн суруллар «Уус Алдан кэскилэ» сурунаал таһаарбыттар.
Кэлин Анна Прокопьевна араас салайар үлэҕэ айымньылаахтык үлэлээн, билигин бочуоттаах сынньалаҥҥа олорор.
Лиза Готовцева, Мүрү 1 №-дээх орто оскуолатын 3 кылааһын үөрэнээччитэ, “Өркөн” оҕону эбии үөрэхтээһин киинин эдэр корреспондена