“Өркөн” оҕону эбии үөрэхтээһин киинигэр саахымакка улуустааҕы чемпионат саҕаланна. Бу күрэхтэһии Уус Алдан улууһун комплекснай спартакиадатын иһинэн тэрилиннэ, Саха Өрөспүүбүлүкэтигэр физкультурнай хамсааһын 100 сылыгар ананна.
Сүрүн сыала – нэһилиэнньэҕэ саахыматы киэҥник тарҕатыы, маастарыстыбаны үрдэтии, улууска бастыҥ саахымаччыттары таһаарыы.
Бүгүҥҥү чемпионакка 12 хамаандаттан 48 кыттааччы кэллэ. Хамаандаҕа 3 эр киһи, 1 дьахтар оонньоотулар. Бастаабыт хамаанда бэйэтин нэһилиэгэр очко аҕалан, комплекснай спартакиадаҕа ааҕыллар.
Күрэхтэһии үөрүүлээх аһыллыытыгар улуус администрациятын успуорка, ыччакка уонна дьиэ кэргэн политикатын өйүүр отдел салайааччыта Михаил Слепцов күрэхтэһээччилэргэ ситиһиини баҕарда. Саахымат федерациятын председателэ Яков Колодезников саҥа саахыматтар кэлбиттэрин бэлиэтээтэ, Үүнэр көлүөнэ фондатын салайааччытыгар Владимир Егоровка улахан махталын эттэ. Күрэхтэһии судьуйата Дмитрий Павлов, саахымат федерациятын чилиэнэ Артамон Максимов күрэхтэһии балаһыанньатын билиһиннэрдилэр.
Тыҥааһыннаах киирсии, өй-мэйии күүстээх үлэтин түмүгүнэн улахан нэһилиэктэргэ Найахы бастаан, кыайыы өрөгөйүн биллэ. Иккис миэстэҕэ Курбуһах, үһүскэ Суотту хамаандалара таҕыстылар. Кыра нэһилиэктэргэ Майаҕас хамаандата кыайыылаах буолла, иккискэ Чараҥ, үһүс миэстэ Бээрийэ нэһилиэктэрэ буоллулар.
Мичийэ Бурнашева, “Өркөн” оҕону эбии үөрэхтээһин киинин пресс-киинин эдкора