Оҕолорго аналлаах социальнай-реабилитационнай улуустааҕы кииҥҥэ олус уратылаах тэрээһин атырдьах ыйын 9 күнүгэр буолан ааста – бу күн «Кустук» оҕо сайыҥҥы былаһаакката бу сылга түмүктүүр 3-с сезонун арыйда. Оттон бу сезоҥҥа иитии үлэтэ иитээччи Татьяна Свинобоева көҕүлээһининэн «Музыка для всех» бырайыагынан саҕаланна.
Тэрээһин музыкальнай инструменнарга маастар-кылааһынан арылынна. ХИФУ иһинэн юридическай колледж устудьуона, «Тыыннаах» ВИА барабанщига Артур Свинобоев «Roland» электроннай ударнай установканы уонна «Sonor» кэнсиэрдиир барабааны илдьэ кэлэн оҕолорго көрдөрдө, үөрэттэ. Иккиэн тус-туһунан тыаһыыр тэриллэр эбит. Маннык араастаан тиҥиниир-таҥыныыр, ньиргийэр тыас-уус бу тэрилтэ иһигэр аан бастаан иһилиннэ. Ол да иһин оҕолор, төрөппүттэр, үлэһиттэр бары ах баран доргуйар дорҕоон тэтимигэр олорсон атын эйгэҕэ киирдилэр.
Оҕолор бу охсор, тэбэр тэриллэри оҕо эрдэҕиттэн баһылаабыт барабанщик уол умсугутуулаахтык оонньуурун көрөн соһуйбут, сөхпүт, үөрбүт харахтара чоҕулуҥнастылар, ытыстарын таһыннылар, эккирээмэхтээн да ыллылар.Өссө бэйэлэрин эт илиилэринэн тутан-хабан, тэриэлкэ курдуктары, барабааннары охсон, тэбэн көрөннөр олус астыннылар. Төрөппүттэр оҕолоро бу аан бастаан харахтаан көрбүт тэриллэригэр оонньоон боруобалаабыттарын дуоһуйа көрдүлэр-иһиттилэр.
Салгыы таһырдьа тахсан бырааһынньыктыы киэргэтиллибит тэлгэһэҕэ Айаал Колодезников сахалыы саймаархай, Сайнаара Тогонохова нууччалыы тэтимнээх ырыалара, Ваня Попов истиҥ хоһооно, Федоровтар дьиэ кэргэн үчүгэйкээн фольклорнай нүөмэрдэрэ уонна көрдөөх оонньуулар, наһаа минньигэс астаах остуол оҕолору олус үөртүлэр, дьоллоотулар, үөһэ көтүттүлэр. Онон оҕо саас биир дьоллоох түгэннэрдээх күнэ былаһаакка былааҕын өрө таһаарыынан түмүктэннэ.
Светлана Бурцева, уопсас. кэрэсп.