Бэрт сотору балаҕан ыйыгар үктэниэхпит. Ол аата ДьУоКХ үлэһиттэрин түбүктээх күннэрэ саҕаланыахтара. Эрдэ биллэрбиттэрин курдук, онно бэлэмнэнэн хайыы үйэ атырдьах ыйын 31 күнүттэн киин ититэр ситимнэргэ ууну хачайдаабытынан барыахтара.
Бу эппиэттээх, түбүктээх кэмҥэ тустаах салаа бэлэмэ хайдаҕын туһунан ДьУоКХ ГУТ улуустааҕы филиалын кылаабынай инженерэ Анатолий Алексеев маннык билиһиннэрдэ:
– Оттук кэмэ улуус үрдүнэн балаҕан ыйын 7 күнүттэн саҕаланыаҕа. Ол аата хочуолунайдар оһохторо бу күн оттуллан баран кэлэр саас ыам ыйын 22 күнүгэр биирдэ тохтуохтара. Онон сүрдээх эппиэтинэстээх кэмҥэ бэлэмнэнии оттук кэмэ түмүктэнээтин кытары саҕаламмытынан барбыта. Ол иһин билигин толору бэлэмнээх олоробут.
Халлаан эрдэ тымныйдаҕына балыыһа, оскуола, уһуйаан курдук социальнай эбийиэктэргэ сайаапка түһэрдэхтэринэ, эбии сөбүлэһии быһыытынан сылаас эрдэ бэриллиэн сөп. Холобур, Курбуһахтааҕы кырдьаҕастар уонна инбэлииттэр интернат-дьиэлэригэр сылын аайы сылааһы эрдэ биэрэбит.
Онон өссө төгүл санатабын, атырдьах ыйын 31 күнүттэн ититэр ситимнэргэ ууну хачайдааһын саҕаланыаҕа. Ити кэмҥэ тэрилтэлэргэ, уопсай уонна чааһынай дьиэлэргэ кырааннаргытын көрүнэ, кэтээн көрө сылдьаргытын өйдөтөбүн. Иһитиннэрии кэнниттэн дьиэ иһигэр уу барар түгэнигэр ДьУоКХ эппиэтинэһи сүкпэт.
Афанасий Сектяев