Бүгүн, тохсунньу 11 күнүгэр, киинэ оператора, СӨ искусствотын үтүөлээх деятелэ, СӨ култууратын туйгуна Юрий Бережнев 50 сааһын туолла.
Юрий Бережнев Мүрү 1 нүөмэрдээх орто оскуолатын 1991 сыллаахха 11 «в» кылааска (кылаас сал. нуучча тылын учуутала Г.С. Матвеева) үөрэнэн бүтэрбитэ. Оскуолаҕа үөрэнэ сылдьан информатика, физика учуутала Иван Петрович Алексеев салайбыт фотостудиятыгар умсугуйан дьарыктаммыта. Куруһуокка бииргэ сылдьар уолаттар Юра Бережнев, Дима Никифоров, Петя Егоров учууталларын кытта Литваҕа уопут атастаһа бара сылдьыбыттара. Бу айан Юраҕа, Димаҕа идэлэрин талалларыгар олук уурбута.
Юрий Москваҕа С.А. Герасимов аатынан Бүтүн Россиятааҕы кинематография гос. институтун бүтэрбитэ, киинэ оператора идэтин ылбыта. Кини устубут киинэлэрэ: «Оҕо куйуурдуу турара» (2003), «Тайна Чингис Хаана» (2009), «24 снега» (2016), «Бүгүн — былыр» (2022, 2023), о.д.а.
Сүрүн үлэтинэн Никита Аржаков режиссердаах «Тыгын Дархан» (2020) киинэ буолар. Нижний Новгород куоракка ыытыллыбыт XIV Бүтүн Россиятааҕы «Вече» историческай киинэлэр фестивалыгар «Бастыҥ оператор» сүрүн бирииһи ылбыта. «Киинэни устууга улахан үлэ барбыта. Миигин кытта тэҥҥэ үлэлээбит оператор уолаттарга махтанабын. Киинэ искусствотын сүдү маастардара үлэбитин үрдүктүк сыаналаабыттарыттан үөрэбин. Киинэҕэ үлэлэспит худуоһунньуктарга үчүгэй көстүүнү оҥорбуттарын иһин махтанабын», – диэн Юрий Степанович бирииһин тутан баран этэн турардаах.
Оскуола выпускнигынан киэн туттар, айар үлэтигэр ситиһиилэри баҕарар.
Елена Сыроватская, уопсас. кэрэсп.
Хаартыскалар оскуола 1991 сыллаах выпуһун альбомуттан ылылыннылар.