Бүгүн Мүрү нэһилиэгэр нэһилиэнньэни кытта көрсүһүүгэ Олохтоох көҕүлээһини өйүүр бырагыраамаҕа киирэр бырайыактар көрүлүннүлэр.
Ол курдук Мүрү нэһилиэгин бырайыактара – Алданская уулусса суолун оҥоһуллуута, Радиотумул түөлбэ аҥаарыгар ититии ситимэ тардыллыыта, «Алаас» түөлбэ ититии ситимигэр холбоноругар матырыйаалларын хааччыйыы уонна улуус дьаһалтатын бырайыага – улууспут киинигэр сыбаалкаҕа киирии суол оҥоһуллуута киирдилэр. Онуоха олохтоохтор биир санаанан бу бырайыагы өйөөн куоластаатылар.
Салгыы ыҥырыылаах ыалдьыттар – «Градо» бырайыактыыр бюро исписэлиистэрэ – кэлэр сылларга Мүрү нэһилиэгэ араас хайысханан сайдыытыгар туһуланар «мастер-план» оҥоһуллуутун туһунан сырдаттылар, ол кэннэ Мүрү нэһилиэгэ 2024 сылга «Формирование комфортной городской среды» федеральнай бырагыраамаҕа кыттар Мүрү пааркатын бырайыагын анал концепциятын «База14» архитектурнай бюро исписэлиистэрэ билиһиннэрдилэр.
Олохтоохтор барыллаан оҥоһуллубут бырайыакка санааларын, эттилэр, анкета толорон, бырайыакка тус көрүүлэрин киллэрэн баҕа санааларын үллэһиннилэр.
Мария Аргунова