Танда орто оскуолатын бэтэрээн учуутала, өр сылларга математика учууталынан үлэлээбит Ольга Румянцева саха уонна кытай халандаардарынан үүнэр сыл бэлиэлэрин роса хаппахтарыттан оҥорон дьиэтин, тэлгэһэтин киэргэтэр үгэстээх.
Сайын ыһыаҕы көрсө 2023 Дьөһөгөй сылыгар симэхтээх аты уонна бэһиэлэй куобаҕы оҥорон дьиэтин истиэнэтигэр уонна олбуоругар саайбытын хас көрбүт киһи сөхпүтэ.
Үүнэр сылы көрсө 1,5 м. усталаах, туоралаах дракону оҥороругар 905 устуука хаппаҕы туһаммыт. Кини бу дьикти дьарыгын билэр буоланнар аймахтара, дьүөгэлэрэ, үөрэнээччилэрэ хаппахтары мунньан аҕалаллар, ыыталлар.
Ольга Власьевнаҕа ааһан эрэр сыл биир үөрүүлээх түгэнинэн соторутааҕыта буолан ааспыт Педагог уонна настаабынньык сылын түмүктүүр улуустааҕы үөрүүлээх тэрээһиҥҥэ үөрэх управлениетын начаалынньыга Степан Литвинцев «СӨ учууталлар Учууталлара» бэлиэни туттарбыта. Өр кэмнээх үлэтэ бэлиэтэммитинэн учуутал үөрэн олорор.
Елена Сыроватская, уопсас. кэрэсп.