Балаҕан ыйын 21 күнүгэр И.В. Пухов аатынан Окоемовка сүрүн оскуолатыгар Саха сиригэр гражданскай сэрии түмүктэммитэ 100 сылыгар анаан сонун тэрээһиннэр буоллулар.
«Гражданскай сэрии – биһиги улууспутугар» диэн тиэмэлээх бэсиэдэҕэ оҕолорго биллиилээх дьоммут – государственнай деятель Н.Н. Окоемов уонна сахаттан бастакы эпосовед ученай И.В. Пухов эдэркээн саастарыгар эйэ, дьол, олох туһугар саа-саадах тутан бу сэриигэ активнайдык кыттыбыттарын туһунан история учуутала кэпсээтэ.
Салгыы бөһүөлэктэн 5 биэрэстэ тэйиччи Хатыҥнаах диэн сайылыкка гражданскай сэрии бэлиэтэ турбут сиригэр оскуола оҕото барыта уонна учууталлар сатыы айаннаатыбыт. Суолбут уулаах-хаардаах да буоллар, тыа быыһынан былыргы ыллыктарынан, саһарбыт сэбирдэх, мутукча үөһэттэн үллүктүү турарын быыһынан хаамар, айылҕалыын алтыһар, көмүс күһүн кэлбитин эппитинэн-хааммытынан билэн, сибиэһэй салгынынан дуоһуйа тыынан Хатыҥнаах сайылыгы буллубут.
Манна 100 сыл анараа өттүгэр буолбут кыһыллар уонна үрүҥнэр разведчиктара утарыта көрсөн ытыаласпыт сирдэригэр билигин пааматынньык турар. Үөрэнээччилэргэ уонна учууталларга анаан ол историческай түгэн уонна сайылык урукку олохтоохторун туһунан кылгас иһитиннэрии кэнниттэн оскуолабыт 9-с кылааһын бастыҥ үөрэнээччитэ Петя Протопопов гражданскай сэрии геройа Гаврил Егоров туһунан иһитиннэрии оҥорбутун бары да сөбүлүү иһиттибит. Онтон Бартыһаан Дьөгүөрэп туһунан ырыаны учууталлар оҕолор иннилэригэр ыллаан иһитиннэрдибит.
Салгыы эбиэттээн күүс-сэниэ ылынан баран, оҕолор сыал ытыытыгар күрэхтэстилэр, миэстэлэспиттэр мэтээл кэтэр чиэстэннилэр. Учууталлар Бурнашева А.А.,Васильева А.Б., Кириллина М.Н., Никитина Т.А., Ховров Н.К. оҕолорго араас куонкурустары тэрийэн ыытан күммүт биллибэккэ ааста.
Онон бу тэрээһинтэн оҕолор туох эмэ саҥаны, сонуну билэн тарҕаспыт буоллахтарына, сатыы хааман эттэрин-хааннарын чэбдигирдэн кэлэн дуоһуйуу ылбыт буоллахтарына – бу буолар учууталлар үлэлэрэ, бу буолар кэнчээри ыччакка төрөөбүт дойдуга тапталы үөскэтии.
Геннадий Пестряков, Окоемовка сүрүн оскуолатын учуутала