Быйылгы сылы СӨ Ил Дархана Оҕо саас сылынан биллэрбитин олус сөбүлүү ылыммытым. Чахчы даҕаны оҕо диэн утуммутун салҕааччы, инники кэскилбит буоллаҕа. Мин, 4 оҕо ийэтэ, элбэх сиэн эбэтэ, хос эбэтэ буоламмын, биһиги кырачааннарбыт этэҥҥэ улаатан, дьоллоох оҕо саастара ааһан, эйэлээх халлаан анныгар үлэлии-хамсыы сылдьыахтарын баҕарабын.
Бу күннэргэ олохтоох «Сайдыы» култуура киинигэр Тулуна орто оскуолатын үөрэнээччилэрин «Ыллаа-туой, оҕо саас» уонна «Татыйык» оҕо тэрилтэтин «Татыйыктар ыллыыллар» диэн бэртээхэй кэнсиэрдэригэр сылдьан үөрэн-көтөн, сэргэхсийэн олоробун.
Оскуола оҕолоро бука бары нэһилиэкпит гимнин ыллаан ньиргиппиттэрин көрөөччүлэр бары сүһүөхпүтүгэр туран долгуйа иһиттибит. Оҕолор барахсаттар ырыа, хоһоон, үҥкүү, чабырҕах, элбэх буолан хомуска оонньообуттара бу үчүгэйин. Бииртэн биир кэргэх нүөмэрдэр кутуллан иһэллэр.
Татыйыктар элбэх оҕо илиилэригэр музыкальнай инструменнаах норуот ырыаларыттан быһа тардан толорууларын биһирээтим. Оҕолор бэйэлэригэр сөрү-сөп нүөмэр аайы араас кэрэ көстүүмү кэппиттэрэ төрөппүттэр үгүс түбүктэрин туоһута дии санаатым. Оскуола оҕолоро сыанаҕа тутта-хапта сылдьарга үөрэммиттэрэ элбэхтик бэлэмнэммиттэрэ тута харахха быраҕыллар. Бэйэм урукку өттүгэр кэнсиэр биллэрээччитэ буоламмын биллэрбит оҕолору биһирии көрдүм. Инникитин да ити курдук өссө тупсан иһиэхтэрэ диэн эрэнэ хааллым.
Түмүкпэр кып-кыра оҕолортон саҕалаан оскуоланы бүтэрээри сылдьар, аҕыйах хонугунан улахан дьон боруогун атыллыыр оҕолорго тиийэ бука барыларын ыллата, үҥкүүлэтэ, араас нүөмэрдэргэ бэлэмнээбит уһуйааччыларга үгүс көрөөччүлэр, төрөппүттэр, эбэлэр-эһэлэр ааттарыттан улахан махталбытын тиэрдэбит.
Мариса Васильева, уопсас. кэрэсп.