Улуус оскуолаларыгар оҕо көҕүлээһинин кииннэрэ (центр детских инициатив) арыллан ситиһиилээхтик үлэлээн-хамсаан эрэллэр.
Бу кииннэр икки ардыларыгар улуустааҕы куонкурус ыытыллыбыта. Онно кыттыбыт сэттэ оскуолаттан “Сөптөөх анал дьиэлээх-уоттаах киин” диэн номинацияҕа Мындааба орто оскуолатын киинэ бастыыры ситиспитэ. Оттон Лөгөй орто оскуолатын киинэ «Автономнай дьиэ-уот» диэн номинацияҕа бастаабыта.
Мындааба оскуолата бу ситиһиилэрин түмүгүнэн салгыы өрөспүүбүлүкэтээҕи куонкуруска кыттар. Маныаха үлэлэрин түмүгэ ситиһиилээх буоларыгар баҕарабыт.
Оҕо көҕүлээһинин өйүүр киин (центр детских инициатив) Мындааба орто оскуолатыгар балаҕан ыйын 1 күнүгэр арыллан үлэтин саҕалаабыта. Бу эйгэ оҕолор түмсүүлэрин эргийэр киинэ буолуохтаах. Ол курдук үөрэнээччилэр «Тэтим» сэбиэттэрэ, «Арассыыйа өрүөллэрэ» («Орлята России»), Юнармия, полицейскай кылаас, суол-иис эдэр инспектордара түмсэннэр ситиһиилээх үлэни көҕүлүөхтэрэ.
Саҥаны билэр-көрөр, сонун идиэйэлэри олоххо киллэрэр баҕалаах, бэйэлэрин ураты көрүүлэрин үллэстэр, онно үлэлэһэр актыбыыс оҕолор түмсэннэр кэскиллээх үлэни ыытыахтаахтар. Бу үүнэр көлүөнэҕэ олоххо-дьаһахха бэлэмнээх, дойдуга бэриниилээх, үтүө майгылаах-сигилилээх буолууларыгар туһуламмыт улахан бырайыак буолар.
Мантан салгыы оҕолор бу кииҥҥэ оскуола дириэктэрин иитэр үлэҕэ сүбэһитин кытта биир санаанан түмсүүлээхтик үлэлиэхтэрэ. Үөрэнээччилэр билиилэрин хаҥаталларыгар, биир түмсүүлээх коллектив буолалларыгар туһуламмыт араас интэриэһинэй тэрээһиннэр ыытыллыахтара, биллэр-көстөр, ытыктанар дьону, төрөппүттэри, учууталлары кытта көрсүөхтэрэ, үгүһү билиэхтэрэ-көрүөхтэрэ, бииргэ үлэлииргэ сөптөөх суолу тобулуохтара турдаҕа.
Ольга Шепелева