Арассыыйаҕа Дьиэ кэргэн, Саха өрөспүүбүлүкэтигэр Оҕо саас, Уус Алдан улууһугар Аҕа, улууспутугар библиотека тиһигэ тэриллибитэ 100 сылларыгар анаммыт «Дьиэ кэргэн – олох төрдө» нэһилиэктэр икки ардыларыгар ыытыллыбыт улуустааҕы бэстибээл икки бөлөҕүнэн араарыллан кулун тутар 18 күнүттэн саҕаланан түмүктэннэ. Бэстибээл сүрүн сыала-соруга улууспут дьонун, дьиэ кэргэнин биир санааҕа түмүү, сомоҕолооһун, олоххо көхтөөх буолууларын ситиһии, нэһилиэнньэ уус-уран самодеятельноһын сайыннарыы, саҥа талааннары арыйыы.
Бэстибээл икки көрүҥүнэн ыытылынна. Ол курдук, нэһилиэктэр элбэх оҕолоох, холобур буолар дьиэ кэргэттэрин сырдатар, оҕо дьарыктаах буолуутугар нэһилиэк иһинэн үлэлиир түмсүүлэри, куруһуоктары кэпсиир, аҕа уустарын төрүччүлэрин туһунан, ааҕар дьиэ кэргэни билиһиннэрэр, ону сэргэ өбүгэттэн кэлбит көлүөнэттэн көлүөнэҕэ бэриллэр мааны малы көрдөрөр быыстапкалары туруордулар. Уус-уран самодеятельность көрүҥэр ирдэнэр 13 нүөмэрдээх кэнсиэри көрдөрдүлэр. Быйылгы бэстибээл ирдэбилинэн театрализованнай кэнсиэри туруоруу буолла. Туруоруммут сорук силигин ситтэ диэххэ сөп. Дьүүллүүр сүбэ көрүүтүгэр быйыл уларытыы киллэрэн, бэрэссэдээтэли кытта быыстапканы түмэл, библиотека специалистара, оттон кэнсиэри бу эйгэҕэ сыһыаннаах дьон сыаналаатылар.
Култуура бэстибээлигэр бастакы бөлөххө Байаҕантай, Найахы нэһилиэктэрэ, иккис бөлөххө Баатаҕай нэһилиэгэ убаастанар биричиинэнэн кыттыыны ылбатылар. Нэһилиэктэр бары ис сүрэхтэриттэн кыһаллан, дойдубут, нэһилиэкпит туһа диэн тэринэн кыттыбыттара хайҕаллаах. Бары нэһилиэктэр араас дьэрэкээн көстүүмнэри тиктибиттэрэ киһини үөрдэр.
Онон култуура бэстибээлэ ыытыллыбыт сыалын-соругун толору ситтэ диэн сыаналыыбыт. Дьон-сэргэ биир санаанан түмсэн, хас биирдиилэрэ кыһаллыбыта биллэр.
«Дьиэ кэргэн – олох төрдө» нэһилиэктэр икки ардыларыгар ыытыллыбыт улуустааҕы бэстибээл бастакы бөлөҕүн кыайыылаахтарынан буоллулар: I миэстэ – Лөгөй, II миэстэ – Дүпсүн, III миэстэ – Бороҕон нэһилиэктэрэ. Иккис бөлөх кыайыылаахтара: I миэстэ – Бээрийэ, II миэстэ – I Хоро, III миэстэ – Хоро нэһилиэктэрэ.
Култуура бэстибээлин кыайыылаахтарын наҕараадата аны сайын I Хоро нэһилиэгэр ыытыллар улуус ыһыаҕар туттарыллыаҕа.
Сайыына Стручкова, дьүүллүүр сүбэ бэрэссэдээтэлэ,
улуус култуураҕа управлениетын начаалынньыгын
солбуйааччы