Найахыга «Саллаат аартыга» ытык сир Ил Дархан гранын өйөбүлүнэн саҥардылынна

Найахыга «Саллаат аартыга» ытык сир Ил Дархан гранын өйөбүлүнэн саҥардылынна «Балыктаах» общественнай тэрилтэ 2023 с. «Знать, чтобы помнить» бырайыагынан (сал. Айталина Готовцева) Ил Дархан куонкурсун кыайбыта уонна 856 250 солк. суумаҕа үлэ ыытылынна.

Бэтэрээннэр сэбиэттэрин бэрэссэдээтэлэ Светлана Петрова:

– Аҕа дойдуну көмүскүү барар биир дойдулаахтарбытын сэриигэ атаарбыт ытык сирбит – сквер саҥардыллыыта, сэрии, үлэ фронун кыттыылаахтарын сырдык мөссүөннэрин үйэтитэр стела, күрүөтүн уларытыы, умуллубат уот макета, сэриигэ аналлаах паннолар оҥоһулуннулар. Найахы модельнай библиотекатын видеофондатыгар харалла сытар эргэ кассеталары аныгы форматка көһөрүү, библиотека оргтехникатын тупсарыы уо.д.а үлэ барда. Бырайыак үлэтин чэрчитинэн кэнчээри ыччаты патриотическай тыыҥҥа иитиигэ, кыраайы үөрэтиигэ Найахы орто оскуолатыгар, «Чэчир» оҕо уһуйааныгар араас тэрээһиннэр ыытылыннылар. Бырайыак үлэтэ олоххо киирэригэр нэһилиэк тэрилтэлэрин үлэһиттэрэ бары көмөлөөн үлэлээтибит, тулатыгар мас олортубут.

Улуу Кыайыы күнүгэр сквер үөрүүлээх арыллыыта буолла. Сэрии кэмин оҕолоро, үлэ бэтэрээннэрэ, ыччат, үөрэнээччилэр, үлэ коллективтара кыттыннылар. Биир дойдулаахтарын сырдык ааттарыгар сүгүрүйэн, кэриэстээн, венок уурдулар, төбөлөрүн нөрүтэн, чуумпуран турдулар.  Бырайыак ааптара Айталина Готовцева ыытыллар үлэлэри, соруктары сырдатта. Олохтоох дьаһалта баһылыга Петр Слепцов Кыайыы 79 сылынан эҕэрдэлээтэ, Айталина Готовцеваҕа махтал суругу туттарда. Оҕо саадын иитиллээччилэрэ хоһоон аахтылар. Депутаттар сэбиэттэрин бэрэссэдээтэлэ Петр  Румянцев, бэтэрээннэр сэбиэттэрин бэрэссэдээтэлэ Светлана Петрова, сэрии кэмин оҕото Вера Мухина тэрээһин кыттыылаахтарыгар баҕа санааларын, алгыстарын анаатылар. Оскуола  быйылгы выпускнига Арсен Константинов харда тылы эттэ.

Түмүгэр саллаат хааһытын сиэн дуоһуйдулар, народнай поэт Иван Мигалкин хоһоонун күргүөмүнэн дорҕоонноохтук аахтылар.