И.И. Гоголев–Дыргыабай аатынан Найахы орто оскуолатыгар ыам ыйын 7 күнүгэр Н.Н. Тарскай төрөөбүтэ 100 сылынан олохтоох библиотека, ветеран Сэбиэтэ, үлэ наставниктара тэрийиилэринэн оскуола 3-6 кылаас оҕолоругар кылаас чаастара ыытылыннылар.
Наставниктар түмсүүлэрин салайар педагог-психолог Зинаида Константинова библиотека фондатыттан Николай Тарскай олоҕун, үлэтин сырдатар видеороликтары көрдөрдө, түмүгэр оҕолорго кылаас чааһын ис хоһоонунан викторинаны ыытта.
Педагогическай үлэ, спорт ветерана, хайыһарга, сүүрүүгэ оройуон, өрөспүүбүлүкэ чемпиона, призера Матрена Сивцева спортивнай олоҕун, ситиһиилэрин билиһиннэрдэ. Ветераннар сэбиэттэрин председателэ, наставник Светлана Петрова нэһилиэк спортивнай дьиэ кэргэттэрэ: тустууга, остуол тенниһигэр үгүс ситиһиилээх, кэскиллээх Сивцевтэр, спорт араас көрүҥэр дэгиттэр кыахтаах Рожиннар, остуол оонньууларыгар бастыҥ Ушницкайдар, остуол тенниһигэр удьуор сайдыылаах, иннигэ эрэллээх Румянцевтар, саахымакка дьуор дьоҕурдаах Фоминнар тустарынан, спорт, физкультура киһи олоҕор суолтатын сырдатта. Спортка үгүс ситиһиилээх дьиэ кэргэттэр сиэннэрэ эһэлэрин, эбэлэрин, төрөппүттэрин, Матрена Егоровна ситиһиилэрин олус сэргээн, киэн тутта иһиттилэр.
Светлана Петрова, уопсас. кэрэсп.