Муус устар 2-3 күннэригэр Дьокуускайга оҕолор уонна ыччаттар ортолоругар «Пилоты Будущего» Бүтүн Арассыыйатааҕы чөмпүйэнээт Саха сиринээҕи сүүмэрдиир түһүмэҕэ буолан ааста. Тэрээһиҥҥэ сүүмэрдээһин түмүгүнэн улуус аатын Мүрүтээҕи уолаттар гимназияларын “Уолан” хамаандата көмүскүүр чиэскэ тиксибитэ, салайааччы гимназия технология учуутала Руслан Иванович Жирков.
Тэрээһин Дьокуускайдааҕы П.И. Дудкин аатынан сибээс уонна информационнай технология кэллиэһигэр ыытылынна. Икки күн устата Алдан, Бүлүү, Үөһээ Бүлүү, Горнай, Ньурба, Сунтаар, Мэҥэ Хаҥалас, Таатта, Уус Алдан, Чурапчы улуустарыттан уонна Дьокуускай куораттан 17 хамаанда тиэхиниичэскэй тургутуулары ааһан, дьүүлүүр сүбэ иннигэр пилота суох дроннары көтүтүүгэ симулятордарга күрэхтэстилэр. Ону сэргэ оҕолорго «Пилоты Будущего» бырайыак теорияҕа билиилэрин эмиэ бэрэбиэркэлээтилэр.
Түмүккэ бастакы категорияҕа «Пилоты Будущего» чөмпүйэнээт кыайыылааҕынан Мүрүтээҕи уолаттар гимназияларын «Уолан» хамаандата буолла. Иккис миэстэни Үөһээ Бүлүү улууһуттан «Скай Алениксаш» хамаандата, үһүс миэстэни Мэҥэ Хаҥалас улууһуттан «Ястреб-2» хамаандата ыллылар. Бастакы категориялаах пилотунан Мичил Николаев «Уолан» хамаандаттан, оттон 2 категорияҕа бастыҥ пилотунан Кирилл Колтовской «Экодрон» (Дьокуускай куорат) хамаандаттан буоллулар. Кыайыылаахтар Москваҕа финальнай түһүмэххэ Саха сирин аатыттан кыттыахтара.
Күрэх туһунан кылгастык кыттааччылар уонна салайааччы Руслан Иванович Жирков санааларын үллэһиннилэр. Мичил Николаев, 6 кылаас үөрэнээччитэ: — Наһаа долгуйбатаҕым, төһө сатыырбынан кыттыбытым, кыайыылаах буолбуппун истэн олус үөрбүтүм. Бэйэм категориябар пилотирование күрэҕэр кыттан кыайбыппар долгуйбутум, учууталбар Руслан Ивановичка махтанабын.
Руслан Иванович Жирков, технология учуутала: — Күрэх үрдүк таһымнаахтык ааста, тэрийээччилэр кыһаллан оҥорбуттара көстөр. Хамаанда бэлэмнээҕэ кыайыыны аҕалла дии саныыбын, куруһуокпутугар, иллэҥ кэмнэригэр уолаттар сөбулээн дьарыктанар дьыалалара буолан интэриэстэрэ үгүс. Ол эрэн долгуйуу баара, элбэх күүстээх хамаандалар истэриттэн кыайыылаах буолуохпут диэн эрэнэр этибит.
Уолаттарбытын, салайааччыларын Руслан Ивановиһы үрдүк ситиһиилэринэн эҕэрдэлиибит, уонна Бүтүн Арассыыйатааҕы түһүмэххэ ситиһиилэри баҕарабыт.
Айыы Куо Троева, дириэктэри иитэр үлэҕэ итиэннэ уопсастыбаннай түмсүүгэ сүбэһитэ