Бүгүн «Мүрүчээнэ» оҕо тэрилтэтин педагог-психологтара Екатерина Васильева уонна Екатерина Шаньгина улуус оҕо тэрилтэлэрин педагог психологтарыгар анаан психологическай доруобуйа ыйын чэрчитинэн семинар-практикум ыыттылар.
Семинар арыллыытын үөрэх салалтатын социальнай-психологическай сулууспатын сүрүн исписэлииһэ Сардана Готовцева арыйда. Салгыы Екатерина Васильевна билсиһэ таарыйа тренинг эрчиллиилэри ыытта. Онтон Екатерина Прокопьевна уонна Екатерина Васильевна психолог үлэтин сүрүн докумуоннарын, программаларын, доруобуйаларынан хааччахтаах оҕолорго оҥоһуллар анал программалар тустарынан кэпсээтилэр, үлэлии сылдьар ньымаларын, былааннарын билиһиннэрдилэр.
Оҕо саадын тьютордара Айна Попова уонна Айталина Лукина бэйэлэрэ айан таһаарбыт «Дорҕооннуун бииргэ – билиигэ» пособиеларын семинар кыттыылаахтара сэҥээрэ көрдүлэр, иһиттилэр. Учуутал- дефектолог Лилия Сивцева «Нейропсихологическай оонньуулары туттан оҕону бары өттүнэн сайыннарыы» тиэмэлээх маастар-кылаас көрдөрдө.
Учуутал-логопедтар Ульяна Омукчанова уонна Олеся Ушницкая «Оҕо саҥатын сайыннарар холбука оонньууларын» кэпсээтилэр, көрдөрдүлэр.
Түмүккэ семинарга кыттыбыт исписэлиистэр үөрэх салалтатын аатыттан улууска уопуту тарҕатыы туоһу суругун туттулар. Истээччилэр олус интэриэһинэй, элбэх үөрэтэр матырыйааллаах семинар буолбутун бэлиэтээтилэр.
Екатерина Васильева, 5-с №-дээх «Сардаҥа» методическай холбоһук салайааччыта уонна Лилия Сивцева, учуутал-дефектолог