Мүрү 1 нүөмэрдээх орто оскуолатын 7 «б» кылааһын үөрэнээччилэрэ кылаас салайааччыта Федора Бурнашева салалтатынан кэлэктиибинэн айар үлэ чэрчитинэн 5-6 кылаастарга төрөппүттэр идэлэрин, үлэлэрин үөрэппит буоллахтарына, быйылгы үөрэх сылыгар төрүччүнү үөрэтиини саҕалаатылар.
Үлэ хаамыытын отчуотун «Мин дьиэ кэргэним – мин тирэҕим» кылаас чааһыгар көрдөрдүлэр. Оскуола аактабай саалатыгар оҕолор төрөппүттэргэ, кэлбит ыалдьыттарга анаан эҕэрдэ нүөмэрдэри көрдөрдүлэр. Салгыы кылаастарыгар оҕо ийэтинээн «Айар» кинигэ кыһата бэчээттээн таһаарбыт «Төрүччү» табылыыссатын толорон аҕалан төрүччүлэрин кэпсээтилэр. Барыта 16 оҕо төрүччүтүн билиһиннэрдэ.
Уопсай түмүккэ «Знатоки родословной» анал аат Дыгын, Уйгулаана Петровна Бурнашевтарга, Айаана, Людмила Ильинична Сергееваларга, Гаврил, Лена Николаевна Шелковниковтарга иҥэрилиннэ. III миэстэҕэ Арсен, Ирина Георгиевна Осиповтар, II миэстэҕэ Дамир, Валентина Васильевна Федоровтар таҕыстылар. Кыайыылааҕынан Даниэла, Вероника Афанасьевна Никифоровалар буоллулар. Миэстэлэспит дьиэ кэргэттэргэ грамота, сэмэй бэлэх туттарылынна.
Дьүүллүүр сүбэҕэ үлэлээбит улуустааҕы киин бибилэтиэкэ электроннай салаатын иһитиннэрии уонна быраап боппуруостарыгар специалиһа Майя Оллонова туһалаах сүбэлэри биэрдэ. «Сахалар бэрт былыргыттан билсэллэригэр кимтэн кииннээххин, хантан хааннааххын диэн ыйыталлара. Бу кинилэр өбүгэлэрин ытыктыылларын, умнубаттарын, удьуордааһыҥҥа улахан болҕомтону ууралларын туоһута. Аныгы үйэҕэ араас технологиялары туһанан, архыыптарга үлэлээн, саастаах аймах дьонтон ахтыыларын хомуйан, дьиэ кэргэн төрүччүтүн оҥоруу кэскиллээх үлэ буолар. Саҕалаабыт үлэҕит салгыы сайдарыгар баҕарабын», – диэн этиитин түмүктээтэ, салаа үлэтин туһаналларыгар ыҥырда.
Арассыыйаҕа биллэриллибит дьиэ кэргэн сылын түмүктүүр сыаллаах тэрээһиҥҥэ үлэ бастакы хардыыларын билиһиннэрии ыытылынна. Көрө-истэ олорон кылаас оҕолоро төрүччүнү салгыы дириҥник чинчийэн, үөрэтэн, араас таһымнаах куонкуруска, конференцияҕа кыттыахтара, үлэлэрин бэчээккэ биэриэхтэрэ диэн эрэл санаа олохсуйда.
Елена Сыроватская, уопсас. кэрэсп.