Мүрү 1-гы №-дээх орто оскуолатын дириэктэрэ Игорь Сивцев Миирнэйдээҕи эрэгийиэннээҕи техническэй колледж үбүлүөйдээх тэрээһиннэригэр кытта сылдьар.
Биир сонун көстүүнэн Миирнэйдээҕи техническэй колледж, АЛРОСА корпоративнай университета уонна Мүрү 1-гы №-дээх орто оскуолата бииргэ алтыһан үлэлэһэллэригэр салайааччылар үс өрүттээх сөбүлэҥҥэ илии баттаатылар.
Быйылгы үөрэх дьылыттан “ПрофиClub” диэн идэни талар хайысхалаах бырайыак үлэтэ саҕаланыаҕа. Бу бырайыак үөрэнээччилэрэ алмааһы хостуур эйгэҕэ наадалаах идэлэри билсиэхтэрэ уонна инникитин улахан хампаанньаҕа үлэлии киирэр кыахтара үрдүөҕэ. Ону тэҥэ алмааһы хостуур хампаанньа ыытар араас куонкурустарыгар кыттыахтара.
Бу туһунан оскуола дириэктэрэ Игорь Григорьевич маннык кэпсээтэ:
– Маннык алтыһан үлэлиири былырыын сааскыттан толкуйдаан быйыл күһүн кэпсэтиитин ыытан, биһиги улууспут оҕолоро инникитин бырамыысалыннас идэлэригэр үөрэнэн, бу эйгэҕэ үлэһит буолан өрөспүүбүлүкэҕэ туһалаах дьон буола үүнэллэригэр туһулаан дуогабар түһэристибит.
Оҕолорбут “ПрофиClub” бырайыак чэрчитинэн сиртэн хостонор баайы-дуолу туһаҕа таһаарар идэлэри чугастык билсэр эрэ буолбакка, оҥорон таһаарар үөрэх сүнньүн ылыахтара. Инникитин бу бырайыагы сайыннаран, оскуолабытыгар лаборатория тэрийиэхпитин баҕарабыт, оҕолорбут оскуоланы бүтэрэллэригэр туоһу докумуоннаах (корочка) буолалларын курдук толкуйдуохпут.
Биһиги улууспутуттан бырамыысалыннас идэлэригэр үөрэнэр устудьуоннарбыт, үлэлии сылдьар дьоммут олох аҕыйахтар, онон бу сөбүлэҥ сэргэх хамсааһын, көдьүүстээх үлэ буолуоҕа диэн эрэнэбин.
Мария Аргунова