Педагогтар өрөспүүбүлүкэтээҕи ХХ дьаарбаҥкаларыгар «Айар» кинигэ кыһата хаһыс да сылын былаһаакка тэрийэн үлэлэтэр. Экспертэр сүрүн болҕомтолорун маассабай тарҕатыыга сөптөөх бырайыактарга уураллар. Быйыл даҕаны оннук буолла. Сүрүннээн оҕону кыра сааһыттан ааҕыыга уһуйууга аналлаах бырайыактар биһирэннилэр. Көрүү түмүгүнэн кыайыылааҕынан уонна I истиэпэннээх дипломунан Мүрү 1 №-дээх орто оскуолатын алын сүһүөх кылааһын учууталлара Елена Атласова, Евдокия Васильева, Ирина Габышева, Александра Оконешникова уонна уруһуй учуутала Наталья Павлова «Учууталлаах оонньуохха» бырайыактара бэлиэтэннэ.
Бу туһунан бырайыак автордарыттан биирдэстэрэ Евдокия Васильева маннык кэпсээтэ:
— Бырайыакпытын оҥорорго этии киллэрбит, санаа укпут киһинэн коллегабыт Елена Атласова буолар. Ону тута иилэ хабан ылан үлэбит уопутуттан алын сүһүөх кылаас оҕолоругар анаан сатабыллаах үлэ тэтэрээтин оҥорон таһаардыбыт. Ол түмүгэр араас карточкалартан турар остуол оонньуутун оҥордубут. Манна дьиэ кэргэнинэн, оҕо оҕолуун, оҕо учууталлыын оонньуон эбэтэр учуутал уруокка, кылаас таһынан үлэтигэр туһаныан сөп. Оонньуу көмөтүнэн оҕо тылын сайыннарар, дорҕоонноохтук ааҕарга, таба суруйарга үөрэнэр. Оонньууга өс хоһоонноро, таабырыннар, ахсаан киирэ сылдьаллар. Холобур, геометрическай фигуранан оонньуу – танграм оҕо тобуллаҕас өйүн сайыннарар. Оҕону кыра сааһыттан харчыны ааҕа, суоттуу, сатаан тутта үөрэтэргэ аналлаах «Харчыны ааҕыы сатабыла» оонньууну оҥордубут. «Учууталлыын оонньуохха» бырайыакпытыгар онтон да атын оҕону толкуйдатар, үөрэтэр оонньуулар киирдилэр. Бырайыакпыт биһирэбили ылбытыттан үөрэбит. Бу үлэҕэ уруһуй учуутала Наталья Павлова киллэрбит кылаата улахан. Кини талааннаах илиитинэн уруһуйдаабыт үлэлэрэ киэргэтэн, тупсаран, силигин ситэрэн биэрдилэр.
Ити курдук саҥаттан саҥаны була, киллэрэ сатыыр учууталлар үлэлэрэ үрдүк сыанабылы ылбытыттан бары да үөрдүбүт.
Елена Сыроватская, уопсас. кэрэсп.