Үүнэр 2024 сылга улуус “Мүрү саһарҕата” хаһыатыгар сурутуу чэрчитинэн улууспут саамай улахан оскуолатын учууталлара биир бастакынан көхтөөхтүк суруттардылар. Ол курдук учууталлар Лариса Аргунова, Надежда Лазарева, Федора Бурнашева, Матрена Местникова биир бастакынан кытыннылар.
Оскуола дириэктэрэ Игорь Сивцев оскуола бэтэрээн учууталыгар ытык 101 саастаах Матрена Гоголеваҕа, оскуола үөрэтэр чааһыгар дириэктэри солбуйааччы Ольга Бурцева алын сүһүөх кылааска үөрэппит учууталыгар Мария Константиноваҕа сурутан, атыттарга үтүө холобур буоллулар. Оскуола методхолбоһуктара оскуола бэтэрээн учууталларыгар – нуучча тылын учууталларыгар Альбина Говороваҕа, Евдокия Федороваҕа, саха тылын учууталынан үлэлээбит Галина Бочкареваҕа, о.д.а. улуус сонуннарын, холобур буолар үлэһит дьонун туһунан ааҕан билсэллэригэр кыах биэрдилэр.
Елена Сыроватская, уопсас. кэрэсп.