Дьокуускайдааҕы медицинскэй колледж Уус Алданнааҕы филиалыгар бастакы куурус устудьуоннарын сүрэхтиир үөрүүлээх тэрээһин буолла.
Быйыл фельдшер үөрэҕэр 10 устудьуон туттарсан киирдэ. Бу туһунан филиал сэбиэдиссэйэ Любовь Нестерова бу курдук кэпсээтэ:
– Бу ураты күн балыыһабыт иннигэр Үрүҥ халааттаах аанньаллар аллеяларыгар эбии биэс маһы олортубут. Биһиги филиалбытын сүүрэн-көтөн арыйбыт кылаабынай бырааспыт Анна Петрова уонна преподавателлэрбит, куратордарбыт үөрэх кыһатыгар үктэммит устудьуоннарбытын эҕэрдэлээн, баҕа санааларын, дьаныардаах үөрэххэ кынаттыыр тыллары эттилэр, ону сэргэ филиалбыт 2-с кууруһун устудьуоннара музыкальнай нүөмэрдэринэн эҕэрдэлээтилэр. Саҥа үөрэнээччилэрбит, үгэс быһыытынан, үрүҥ халааттарын кэппиттэрэ биир долгутуулаах түгэнинэн буолла. Кинилэр эмиэ бэйэлэрин билиһиннэрэн туран талааннарын көрдөрдүлэр, флешмоб үҥкүүлээн үөртүлэр.
Бастакы куурус устудьуона буолбут Саина Соколова бу курдук үөрүүтүн үллэстэр:
– Оскуоланы бүтэрэн баран, ДьТХГА-гар үөрэнэ киирбитим эрээри, миэнэ буолбатах эбит диэн түмүккэ кэлэн академ ылбытым, онтон салгыы кэргэн тахсан үс оҕоломмутум. Медицинэ үлэһитэ буолар ыра санаа оҕо эрдэхпиттэн баара. Оҕолор улааттахтарына хайаан да медик үөрэҕэр туттарсыам диэн соруктааҕым. Ол эрээри дьиэ-уот, оҕо-уруу түбүгүттэн ордон үөрэнэргэ быыс-арыт да суох курдуга. Арай бу бэйэбит улууспут киинигэр филиал арыллыбытын истэн олус сэҥээрбитим.
Билигин да оҕолорум кыралар, тыҥырах оҥорон харчыланабын. Былырыын ымсыырбытым да, тоҕо эрэ туттарсарга хардыы оҥорорго быһаарына охсубатаҕым. Ону чугас дьонум «эн туттардыын-хаптардыын медицинэ үлэһитигэр наһаа барсаҕын, олох туттарыс, үөрэн» диэн сүбэ-ама бөҕө буолбуттара. Инньэ гынан быйыл туттарсан, устудьуон буолбуппуттан наһаа үөрэ-долгуйа сылдьабын. Олорор сирбэр үрдүттэн үөрэнэргэ табыгастааҕыттан астынабын. Сүбэлээбит дьоммор махтанабын уонна кыһаллан үөрэнэн, үчүгэй үлэһит буолуом диэн эрэнэбин.
Мария Аргунова