От ыйын 8-10 күннэригэр Мэҥэ Хаҥалас улууһун киинигэр Майаҕа Ураһалаах алааска өрөспүүбүлүкэтээҕи XX педагогическай дьаарбаҥка үлэлиир. Педагогтар быйылгы түмсүүлэрин сүрүн сыалынан «Школа в социокультурном измерении» уопсай тиэмэнэн үлэ, уопут атастаһыыта, бырайыактары көмүскээһин ыытыллар.
Улуус үөрэҕин тэрилтэлэриттэн 100-тэн тахса педагог тиийэн араас былаһааккаларынан тэрээһиннээхтик кытта сылдьаллар. Бүгүн дьаарбаҥка үөрүүлээх аһыллыытыгар үөрэх миниистирэ Нюргуна Соколова, үөрэҕи сайыннарыы уонна идэ таһымын үрдэтии институтун дириэктэрэ Ньургун Павлов, Ил Түмэн бастайааннай кэмитиэтин бэрэссэдээтэлэ Елена Голомарева, Мэҥэ Хаҥалас улууһун баһылыга Дмитрий Тихонов, о.д.а. кыттааччылары эҕэрдэлээн тыл эттилэр, көхтөөх үлэҕэ ыҥырдылар.
Бэҕэһээттэн саҕалаан үлэ тигинэччи барар, ол курдук, педагогтарга анаан куурус үлэлиир, ону тэҥэ араас куонкурустар, быыстапкалар, маастар-кылаастар тэриллэллэр.
Бу туһунан үөрэх управлениетын инновационнай-мэтэдьиичэскэй салаатын кыл. специалиһа Ирина Сыроватская маннык кэпсээтэ:
– Дьаарбаҥкаҕа үөрэх управлениета оскуолалар завучтарын айар холбоһуктарын туһунан бырайыагынан кытынныбыт. Манна кэккэ оскуолалар завучтара, үөрэх управлениетыттан Саргылаана Громова, Ирина Олесова буолан бырайыакпытын көмүскээтибит. Улууспут педагогтара хайысхаларынан өрө көтөҕүллэн кытта сылдьаллар. Түмүк сарсын биллиэхтээх.
Дьаарбаҥка салҕанар. Мантан киэһэ күүстээх аҥаардар саха төрүт оонньууларыгар күөн көрсөллөр. Улуус аатыттан Мүрү 1-кы нүөмэрдээх орто оскуолатын учуутала Иван Иванов бастыҥнары кытта киирсэн бэйэтин холонуоҕа.
Елена Сыроватская, уопсас. кэрэсп.