«СӨ үтүөлээх учуутала», «РФ уопсай үөрэхтээһинин бочуоттаах үлэһитэ», СӨ Президенын Гранын хаһаайката, Лөгөй лицей-интернат директорын сүбэһитэ, оҕо хамсааһынын салайааччыта Татьяна Петухова үөрүүлээх сонунун үллэстэр:
– Кэптэни бөһүөлэгэр олус күндү умнуллубат, үөрүүлээх күн үүннэ! Киэҥ, баай историялаах билиибит кыһата – Лөгөй орто оскуолата – саҥа статустанан Лөгөй лицей-интерната диэн ааттанан, билии дойдутун киэҥ эйгэтигэр саҥа аартыктары арыйар бастакы хардыытын оҥордо!
Бу үөрүүлээх түгэни бэлиэтиир күҥҥэ төрөппүттэр, ыалдьыттар тоҕуоруһа мустаннар, оҕолорго сатабыллары, үөрүйэхтэри иҥэрэн Россияҕа, республикаҕа, улууска үгүс ситиһиилээх үөрэнээччилэри таһаарбыт учууталлар, уһуйааччылар Иннокентий Данилов, Екатерина Копырина, Лариса Петухова, Максим Пахомов, Майя Дьяконова, Елена Старкова, Анастасия Колесова, Ия Перевалова «Мастерские креативных идей» диэн маастар кылаастары үрдүк таһымнаахтык ыыттылар.
Ааспыт 2023 сылга республикаҕа, улууска үрдүк көрдөрүүлээх учууталлар Александра Копырина, Валентина Тищенко, Валентина Нафанаилова «Золотые уроки лучших учителей по итогам 2023 года» диэн аһаҕас уруоктары ыыттылар.
«Разговоры о важном» кылаас чаастарыгар «Дорообо, Лөгөйбүт лицейэ!» диэн темалаах ыытыллан, киэҥ, баай историялаах билии кыһата инникигэ эрэллээхтик үктэнэн, күн бүгүн саҥа статустаах Лөгөй лицей-интерната буола үүммүтүн, хас биирдии үөрэнээччи дириҥник өйдүүр гына ыытылынна.
«Туругура тур, Лөгөйбүт лицейэ!» үөрүүлээх аһыллыыта хаһан да умнуллубаттык, чаҕылхайдык, үрдүк таһымҥа ыытылынна. Ол курдук, Лөгөй лицейин директора Михаил Пухов үгүс ахсааннаах үөрэнээччилэрбит, учууталларбыт аан дойдутааҕы, бүтүн Россиятааҕы, республикатааҕы, улуустааҕы араас таһымнаах олимпиадаларга, конкурстарга, НПК-ларга үрдүк ситиһиилэри ылан, республикаҕа 15 бастыҥ оскуола ахсааныгар киирбиппитин киэн туттан ахтан туран, саҥа статустаах Лөгөй лицей-интерната аһыллыбытын туһунан үөрүүлээх быһыыга-майгыга билиһиннэрдэ!
Үөрүүлээх тэрээһиҥҥэ Лөгөй нэһилиэгин баһылыгын солбуйааччы Владимир Петров, Уус Алдан улууһунааҕы үөрэх управлениетын начальнига Степан Литвинцев бэйэлэрин истиҥ эҕэрдэлэрин тиэртилэр.
Саамай үөрүүлээх түгэнинэн үөрэнээччилэр «лицеист» үрдүк аатын өрө тутарга, үчүгэйдик үөрэнэргэ, үтүө киһи буоларга андаҕар тылларын биэрдилэр!
Оҕолор үөрүүлэрин үллэстэ Саха сирин чаҕылхай ыччата, эстрада сулуһа Эрхан Попов уоттаах-күөстээх дискотекаҕа аныгы ыччат саамай сөбүлээн истэр ырыаларын бэлэх уунан умнуллубат киэһэни бэлэхтээтэ.
Екатерина Мигалкина, уопсас. кэрэсп.