«Эн хаарга сардаана үүннэрдиҥ» диэн ырыа тылыгар этиллэринии, кырыа кыһын ортото кэрэчээн бэйэлээх сибэккилэр тылланнар сүрэҕи үөрдэллэр, дууһаны сылаанньыталлар. Кыһын тыллыбыт сибэккилэр ураты кэрэ иэйиини саҕаллар. Улууспут кэрэни таптыыр хаһаайкалара күн бүгүн сириэдийэн турар сибэккилэрин хаартыскаҕа түһэрэн үллэстибиттэрин сибэккини үүннэриэн баҕалаахтарга туһалыа диэн таһаарабыт.
Клара Крылова, Чараҥ бөһүөлэгин олохтооҕо:
– Мин фиалканы сөбүлээн олордобун. Көрүүтэ-истиитэ олус судургу, элбэх ууга наадыйбат, тулуурдаах. Кинилэри тэнитэргэ сэбирдэҕин да тууран олортоххуна, үүнэр сибэкки. Мин түөрт араас дьүһүнүн олордубутум. Сотору-сотору хойуутук сибэккилииллэр. Балай да өр тураллар.
Надежда Бурнашева, Кэптэни бөһүөлэгин олохтооҕо:
– Немантус – тропическай үүнээйи, дьиэ иһигэр үүннэриллэр, сылы быһа эргиччи сибэккилиир, хойуу сэбирдэхтээх уонна оранжевай балыкка майгынныыр кыра сибэккилэрдээх. Күннээх сырдык сири сөбүлүүр, наһаа сииктээх буору сөбүлээбэт.
Гиацинт – спаржевай үүнээйилэргэ киирэр. Луковицанан үүнэр, сылга биирдэ тыллар. Сибэккитэ ураты сыттаах. Дьиэ иһин сытынан толорор. 4-5 араас дьүһүннээх буолар. Элбэх ууга наадыйбат, сырдык сири сөбүлүүр.
Кыһын үгүс сибэкки сибэккилиирэ тохтуур. Ол гынан, баран хаартыскаҕа көрөргүт курдук, сылы быһа эргиччи сибэккилиир үүнээйилэр эмиэ бааллар.
Мария Жиркова, Мүрү нэһилиэгин олохтооҕо:
– Герань сибэккини сөбүлээн үүннэрэбин. Ордук «Королевскай пеларгонияны», кини сыта суох уонна сибэккилэрэ быдан хойуу буолар. Үс ый курдук утуйар, ол кэмҥэ отросток быһан силис таттарыахха сөп.
Мария Аргунова