Курбуһахха нэһилиэк ыһыаҕын кэмигэр биир ураты түгэн буолан ааста. Ол курдук Аҕа дойду Улуу сэриитин бэтэрээнэ, тимир, мас ууһа Николай Петрович Костромин – Сэбирдэх Уус хаан аймаҕа Лукерья Петровна Аммосоваттан-Костроминаттан сыдьаан тардар аймахтар сүбэлэһэн анал бэлиэ оҥорон туттардылар. Бу бэлиэни анал байыаннай дьайыы кыттыылаахтарыгар туттардылар.
Бырайыак ааптара РФ норуотун үөрэҕириитин туйгуна, СӨ үөрэхтээһинин систиэмэтин бэтэрээнэ Пелагея Потапова бу бэлиэ туох санааттан оҥоһуллубутун туһунан маннык кэпсээтэ:
– Аймахпыт Николай Костромин да, төрөппүт аҕабыт, үс уордьан кавалера Дмитрий Аммосов да, иккиэн Аҕа дойду сэриитин кыттыылаахтара этилэр. Ол иһин билигин буола турар анал байыаннай дьайыыга уолаттарбытын онно тэҥнээн, Аҕа дойдуларыгар, Россияҕа бэриниилээхтэригэр, хорсун санааларыгар сүгүрүйүүбүтүн, махталбытын көрдөрүү бэлиэтэ буолар. Бэлиэни аҕабыт бииргэ төрөөбүт балтын Елизавета Васильева сиэнэ Константин Васильев чочуйан оҥордо. Бэлиэни Курбуһах нэһилиэгиттэн төрүттээх, манна улааппыт, үлэлээбит ыччакка туттардыбыт.
Курбуһах нэһилиэгиттэн төрүттээхтэр анал байыаннай дьайыыга 8 уол баран кэллилэр. Билигин да сылдьаллар. Хомойуох иһин кинилэртэн 3-рэ дойду көмүскэлин иһин олохторун толук уурдулар. Бэлиэнэн наҕараадаламмыт анал байыаннай дьайыы кыттыылаахтара:
- Михаил Винокуров (өлбүтүн кэннэ)
- Феррум Аммосов (өлбүтүн кэннэ)
- Егор Местников (өлбүтүн кэннэ)
- Николай Аммосов
- Борис Васильев
- Илья Шишигин
- Иван Петров
- Рустам Алексеев
Бу бэлиэни таһынан быйыл дойдубутугар Дьиэ кэргэн, өрөспүүбүлүкэбитигэр Оҕо саас, улууспутугар Аҕа сыла биллэриллибитинэн нэһилиэккэ олорор 60-тан тахса сыл бииргэ олорор икки ытык ыалга, биир сэттэ оҕолоох уонна икки алталыы оҕолоох бастыҥ дьиэ кэргэттэргэ “Аҕа, Ийэ – дьол” диэн ураты бэлиэ туттарылынна.
Афанасий СЕКТЯЕВ