Биир ытыктанар кырдьаҕаспыт үлэ бэтэрээнэ Ульяна Ивановна Аржакова 1939 с. Чурапчы оройуонун Хатылы нэһилиэгэр күн сирин көрбүт. 1942 с. үс саастаах кырачаан кыыс дьонун кытары ыраах Булуҥ улууһугар көһөрүллүүгэ барбыттар. Кыайыы буолан 1946 с. дойдуларыгар төннүбүттэр. Оҕо эрдэҕиттэн омук тылын интэриэһиргиир кыыс оскуола кэнниттэн Иркутскай институтугар омук тылын салаатын бүтэрэн үлэтин Кэбээйи оройуонун Сангаар бөһүөлэгиттэн саҕалаабыт.
Онтон 1986 с. СГУ-га улахан куонкуруһу ааһан омук тылын преподавателинэн 22 сыл устата эҥкилэ суох үлэлээбит. 90-с сылларга дойдубутугар уларыта тутуу кэмигэр Саха сириттэн омук дойдуларыгар быһаччы көтүү баар буолан «Якутия» авиакомпания Ульяна Ивановнаны ыҥыран авиатордары, аэропорт үлэһиттэрин английскай тылыгар үгүс сыл таһаарыылаахтык үөрэппитин махтал суруктара, грамоталара кэрэһэлииллэр. 2018 с. бочуоттаах сынньалаҥҥа олорор. Интэринээккэ үөлээннээхтэрин омуктуу дорооболоһорго үөрэтэр. Английскайдыы кэпсээннэри, романнары ааҕан бииргэ олорор дьүөгэлэригэр сэһэргиир. Учууталлыы истиҥ, ис-киирбэх майгытынан кэлээт да кэлэктиипкэ тута сөбүлэтэн, дириҥ убаастабылы ылар.
Биир ытыктанар кырдьаҕаспытынан олоҕун оскуолаҕа киириэн иннинээҕи саастаах оҕолору иитиигэ анаабыт үлэ бэтэрээнэ Татьяна Захаровна Аммосова буолар. 1941 с. II Өспөх нэһилиэгэр «Таала» диэн кыра алааска күн сирин көрбүт. Дүпсээ оскуолатын бүтэрэн баран 1962 с. уһуйааҥҥа иитээччинэн үлэлээбит. Онтон Бүлүү педучилищетыгар иитээччи идэтин баһылаан Уус Алдан улууһун Өспөх бөһүөлэгэр 1977 с. диэри үлэлээбит. Онтон олоҕун аргыһын култуура үлэһитэ И.И. Аммосов көрсөн ыал буолан Курбуһахтааҕы деткомбинатка кыра группа оҕолоругар 35 сыл устата иитээччинэн үлэлээн өрүү хайҕабылга, убаастабылга сылдьыбыта. Аҥаардас күннээҕи үлэтинэн эрэ муҥурдаммакка улуус, республика таһымнаах семинардарга дакылааттарынан кыттан, үлэтин уопутун тарҕатар үтүө бачыымнаах иитээччи быһыытынан биллэр.
Кэргэнэ Иннокентий Иннокентьевич Татьянатын үөрэтэр босуобуйаларыгар олус үчүгэйдик уруһуйдаан көмөлөһөрө, ол уруһуйдарын Татьяна Захаровна толкуйунан, ыйыытынан-кэрдиитинэн сиэдэрэйдик киэргэтэн дьон болҕомтотун олуһун тардара. Холобур, тыа кыылларын саһылы, кииһи, куобаҕы уруһуйдаан баран кутуруктарын кыыллар дьиҥнээх түүлэринэн ситэрэн биэрэллэрэ, оҕону көрдөрөн үөрэтэргэ-билиһиннэрэргэ бэртээхэй өйдөнүмтүө буолан тахсара. Сорох босуобуйаларын билиҥҥэ диэри иитээччилэр үлэлэригэр туһаналлар.
Бастыҥ үлэтин иһин Татьяна Захаровна нэһилиэк, улуус, республика үөрэҕин управлениеларын, үөрэх министерствотын хайҕал суруктарынан, бочуотунай грамоталарынан бэлиэтэммитэ. Үлэлиир кэмнэригэр тэрилтэтигэр профком председателинэн, түөлбэ салайааччытынан таһаарыылаахтык үлэлээбитэ, кэргэнинээн нэһилиэк общественнай олоҕун олус актыыбынай кыттааччылара буолаллара. Билигин да ол бачыымын ыһыктыбакка интэринээппит культурнай-бытовой комиссиятын биир тутаах киһитэ буолар. Араас тэрээһиннэрбитигэр тумус туттар бастыҥ сүбэһиппит, актыбыыспыт, «Хотууна» вокальнай ансаамбылбыт кыттыылааҕа.
Мария Винокурова, Курбуһах