Курбуһахтааҕы интэринээт-дьиэҕэ иис кэрэ абылаҥар ылларан олохторун тухары иннэттэн-сүүтүктэн илиилэрин араарбатах ытык-мааны кырдьаҕастар бааллар. Бүгүн манна Норуот маастарын күнүн бэлиэтээбиттэрин туһунан Мария Винокурова иһитиннэрдэ:
– Биһиги олохтоохторбут ортолоругар тарбахтарыгар талааннаах иистэнньэҥнэр – СР норуот маастара, СР Ытык сүбэ бэлиэ хаһаайката, САССР бастыҥ ыанньыксыта, СР бочуоттаах бэтэрээнэ Клара Михайловна Явловская, үлэ бэтэрээнэ, үлэ ударнига, социалистическай куоталаһыы кыайыылааҕа, бастыҥ ыанньыксыт Мария Петровна Сивцева, коммунистическай үлэ ударнига, үлэ бэтэрээна, Герой Егоров колхуос буҕаалтыра Матрена Александровна Павлова баалларын киэн тутта ааттыыбыт.
Бүгүн Норуот маастарын күнүгэр көмүс илиилээх иистэнньэҥнэрбит оҥоһуктарын быыстапката барыбыт сэҥээриитин тарта. Мария Сивцева сиэдэрэй быысапкаларын, Матрена Павлова «Кыыс хоһо» кэмпилиэгин, Клара Явловская оҕуруонан, сиэлинэн, кыбытык тигиилэрдээх оҥоһуктарын биһирии, сөҕө көрдүбүт. Талааннаах Далбар Хотуттарбыт хайдах бастаан угуйуллан иис эйгэтигэр олохторун анаабыттарын туһунан кэпсээбиттэрин сэҥээрэ иһиттибит. Кырдьаҕастарбыт иистэнэр сыах сэбиэдиссэйэ, уран тарбахтаах иистэнньэҥ Розалия Ноговицына тикпит сахалыы таҥастарын кэтэн кэккэлэһэ хаамыстылар.