Сайыммыт барахсан үлэни үмүрүтэн, көмүс күһүнүнэн күлүмүрдэтэн уһун кыһыҥҥа бэлэмнэнии үлэлэр хас биирдии тиэргэҥҥэ киирэн эрэллэр.
Хайдах кыстык буолара биллибэт. Ол сиэринэн, мин эмиэ оттук мас кыһалҕатын өйдөөн, күһүн-саас отторго диэн, көтүллүбүт олбуорум остуолбаларын, о.д.а. быстаҕас мастары эрбэттэрээри киһи көрдөнө сырыттахпына, ыалым кыыс учуутал идэлээх Матрена Васильева истэн, үөрэх кэнниттэн оскуола үрдүкү кылааһын уолаттарын уонна патриотическай кулууп салайааччытын Иван Петрову аҕалан маспын барытын эрбэттэрэн, хайыттаран, олус үөртэ.
Үөрэрим, сөҕөрүм диэн – уолаттар үлэҕэ олус көхтөөхтүк кытыннылар, ол курдук сүгэнэн олус сатабыллаахтык тутталлар эбит. Көтүллүү мас буолан тоһоҕото элбэх этэ, онуоха учууталлара да, оҕолор да мындыр туттууларынан, мас эрбэнэн, хайытыллан биир сиргэ чөмөхтөнөн саһааҥҥа бэлэм буола оҕуста. Оҕолор үлэлэринэн олус астынным, барҕа махталбын биллэрэбин. Оттон педколлективка бу курдук үлэҕэ, үөрэххэ куруук көхтөөх, иллээх-эйэлээх үлэнэн бар дьоҥҥутун куруук үөрдэ тураргытыгар баҕарабын. Оҕолорго ситиһиилээх үөрэҕи, дьоллоох оҕо сааһы!
Анна Винокурова, уопсас. кэрэсп. Курбуһах