Суотту орто оскуолатыгар самаан сайын үтүө күннэригэр «Кэскил» үлэ, сынньалаҥ лааҕырыгар 7-13 саастаах 42 оҕо, ол иһигэр элбэх оҕолоох дьиэ кэргэн, анал байыаннай дьайыы кыттыылааҕын оҕолорун хабан, икки этэрээтинэн түмэн туһалаах сынньалаҥы тэрийдилэр, ситиһиилээхтик үлэлээтилэр.
Лааҕыр үлэтин сүрүн хайысхаларынан – эт-хаан өттүнэн тупсарыгар «Доруобуйа күлүүстэрэ» минуткаларга, кэрэ эйгэтигэр уһуйар «Ырыа түһүлгэтэ» бөлөҕүнэн ыллыырга, тобулук өйү сайыннарар «Туһалаах математика хонуутугар», оскуола производственнай хаһаайыстыбатыгар үлэ үөрүйэхтэригэр уһуйар оҕуруокка, дьиэ көтөрдөрүн көрүүгэ үлэҕэ оҕолор кыһамньыларын ууран дьарыктаннылар, үлэлээтилэр, үгүс билиини иҥэриннилэр. Оҕо аймах сэргэх күрэхтэргэ, көрдөөх оонньууларга бэйэ-бэйэлэрин кытта ыкса бодоруһан, трениннэргэ тус бэйэлэрин ураты өрүттэрин билэн сэргээтилэр.
Лааҕыр былааннаах үлэтин чэрчитинэн оҕолор Суотту нэһилиэгин ыһыаҕын арыллыытын сиэригэр-туомугар тэрээһиннээхтик кыттан биһирэбили ыллылар. Бүтүн Россиятааҕы «Бастыҥнар хамсааһыннара» тэрийэн ыыппыт «Первые читают», «Друзья в движении», «Моя Россия», «Первые помнят» акцияларга көхтөөхтүк кытыннылар. Лааҕыр иитиллээччилэрэ киэҥ сиргэ дьоһуннаахтык сылдьарга, тус бэйэни көрүнэ-бэринэ үөрүйэхтэнэргэ, билиилэрин хаҥатар соруктаах Дьокуускайга, «Дружба» музейыгар экскурсияларга элбэх интэриэһинэйи, саҥаны-сонуну билбиттэриттэн үөрүүлэрэ үксээтэ, дьоһуннаахтык сылдьан салайааччыларын үөртүлэр.
Оҕо сынньалаҥын тэрийии эппиэтинэстээх, бары өттүнэн ирдэбилгэ эппиэттиир буолуохтаах. Лааҕыр үлэтигэр көмө-өйөбүл буолар оскуола салалтата болҕомтотун ууран, сыллата араас хайысхалаах лааҕыр аһылларыгар бары өттүнэн төһүү күүс буолара олус туһалаах.
Оҕо сынньалаҥын сөптөөхтүк былааннаан тэрийбит, истиҥ эйгэни үөскэппит иитээччилэр Елизавета Портнягинаҕа, психолог Антонина Блиноваҕа, эмчит Мария Крыловаҕа, умсугутар маастар кылааһы ыыппыт эбии үөрэхтээһин педагогар Антонина Константиноваҕа, минньигэс астаах повар Ирина Максимоваҕа оҕолор, төрөппүттэр махталлаахтар.
Ала Соболоох сайылык ыҥырар
Ала Соболоох сайылыкка Суотту орто оскуолатын оҕолорун кытта тэҥҥэ Дьокуускайтан Айыы Кыһатын оскуолатыттан 12 оҕо тыа сирин олоҕун, сайылык эйгэтин билсээри, оҕолордуун алтыһаары кэлэн сынньаннылар.
Учууталлара физкультура учуутала, волейбол тренерэ Елена Сокольникова волейболга дьарыктанар оҕолору илдьэ кэлэн бэрт сэргэх, сонун сезон буолан ааста. Оҕолор волейболга дьарыктаннылар, ол быыһыгар араас дьарыктар буоллулар. Эдэр, кэскиллээх математика учуутала Айна Слепцова оҕолорго практическай математикаҕа, геометрия предметтэригэр интэриэһинэй дьарыктары, маастар кылаастары ыыппытын оҕолор олус сэргээтилэр. Минньигэс астаах поварынан Екатерина Никитина үлэлээтэ.
Оҕолор ферма үлэһиттэригэр ньирэй аһатан көмөлөстүлэр, ынах ыыры, үүт сэппэрээтэрдиири, мээрэйдииринэн үүт ыйыырга үөрэннилэр.
Светлана СИВЦЕВА