Суол – сайдыы төрдө. Курбуһах нэһилиэгэ төһө да куһаҕан суоллаах нэһилиэктэр ахсааннарыгар киирбэтэр, күһүн-саас манна айан бэрт эрэйдээх буолааччы. Онон суол тутуутун туруорустулар уонна үрэх сир уратытын, туораттан элбэх үрүйэлэр ууларын киллэрэллэрин учуоттаан оҥороллорун эттилэр. Урукку өттүгэр быстах өрөмүөннэр ыытыллыбыттарыгар ол болҕомтоҕо ылыллыбакка, угут дьылларга суол суураллыбытын санаттылар. Былырыыҥҥы отчуокка бу боппуруос мунньах боротокуолугар эмиэ киллэриллибит эбит.
Уонча сыллааҕыта маннык отчуоттарга бөһүөлэктэри толору киинтэн ититиигэ киллэрэр туһунан туруорсуу суох буолара. Оттон билигин нэһилиэк аайы этэллэр. Курбуһах нэһилиэгэ үс бөһүөлэктээх. Мантан саамай кытыы, Чурапчы улууһун быысаһыытыгар олорор Балаҕаннаах учаастагын 17 ыала бары киинтэн ититиигэ холбоммуттара. Ол үтүө өрүтүн хайыы-үйэ көрдөрөн эрэрин эттилэр. Ол курдук манна соторутааҕыта түөрт ыал көһөн кэлбит, оскуола-саад оҕотун ахсаана 17 буолбут. Онон тыа сиригэр ыччат олохсуйуутугар киинтэн ититии киирэрэр улахан суолталааҕын эттилэр. Аны быйыл Окоемовка бөһүөлэгэр ситэ холбоно илик 24 ыалы ититиигэ киллэрдэхтэринэ эмиэ оннук балаһыанньаны кэтэһэллэр.
Нэһилиэк киинигэр Уус Күөлүгэр ити балаһыанньаны “Юпитер” чааһынай тэрилтэ улаханнык буортулаабыт. Икки сыллааҕыта бөһүөлэк киин өттүн ититиигэ холбуубун диэн дуогабардаһан баран. саҕалаабыта буолан иһэн уһата-кэҥэтэ сылдьар эбит. Олунньу ыйтан таһаҕаһы барытын таһан үлэни саҕалыахпыт диэн эрэннэрбитин күүтэ олоробут дэһэллэр. Киһи сөҕүөх “Юпитер” тэрилтэ Уус Күөллэрин ыалларыттан 200-түү тыһ. хомуйан уопсайа 17 мөл. солк. “үктэтэн” ылбыт. Ону төлөөбүт дьон бары кэриэтэ кредиккэ киирбиттэр. Онон бу дуогабары көтүрэн, үлэни ДьУоКХ ылсарыгар туруорустулар. Онуоха СӨ ДьУоКХ уонна энергетикаҕа министрин бастакы солбуйааччы Аян Кириллин маны мунньах боротокуолугар киллэрэн баран, салгыы министиэристибэҕэ үөрэтэн көрүөхпүт, үлэлэһиэхпит диэтэ.
Афанасий Сектяев