Кэптэни бөһүөлэгэр тэрилтэлэр истэригэр спортивнай күрэхтэһиилэр ыытыллаллар. Бу күрэхтэһиилэри нэһилиэк спортинструктора Петр Перевалов тэрийэр. Эрдэ ДьУоКХ Уус Алданнааҕы филиалын Кэптэнитээҕи учаастагын уонна баһаарынай чаас үлэһиттэрэ бэйэлэрин икки ардыларыгар бастыҥнары быһаарбыттара.
Оттон бу күннэргэ Кэптэни учаастактааҕы балыыһатын үлэһиттэрин икки ардыларыгар биэс көрүҥнээх күрэхтэһии буолан ааста. Барыта аҕыс үлэһит кытынна.
Түмүккэ кыайыылааҕынан медсиэстэрэ Ирина Попова буолла, иккис миэстэни санитарка Галина Кривогорницына, үһүс миэстэни повар Мария Трофимова ыллылар.
Ханнык баҕар күрэхтэһии спонсордар көмөлөрүнэн ыытыллар, онон өрүү күүс-көмө буолар дьоммутугар махтанабыт. Кыттааччылар спонсордар биэрбит бэртээхэй бэлэхтэрин тутан үөрдүлэр-көттүлэр.
Үрүҥ халааттаах аанньалларбыт түүнү-күнү аахсыбат үлэлэриттэн быыс булан бу күрэхтэһиигэ кыттан сынньанан, астынан тарҕастылар.
Екатерина Мигалкина, уопсас. кэрэсп.