Бүгүн Өрөспүүбүлүкэтээҕи лицей үөрэнээччилэрин саха тылын киэҥник тарҕатар сыаллаах “Күн” оҕо түмсүүтэ Мүрүтээҕи 2-с №-дээх орто оскуолатыгар кэлэн улууспут оҕолорун кытта көрүстүлэр. Манна Уус Алдан улууһун оскуолаларыттан чаҕылхай, көхтөөх, саха тылын туһугар туруулаһар 8-11 кылаас үөрэнээччилэрэ, барыта 70-ча оҕо кытынна.
Өрөспүүбүлүкэтээҕи лицей 10-с кылааһын гуманитарнай хайысхалаах үөрэнээччилэрэ Күннэй Гуляева, Саша Лугинова, Нарыйаана Прокопьева, Валерия Михайлова, Диана Дьячковская оҕо оҕоттон түргэнник үөрэнэр диэн сорук туруорунан, оҕолорго төрөөбүт тыл тирээн турар кыһалҕаларын кэпсээтилэр, үгүс оҕо, ордук кыра саастаахтар нууччалыы эрэ саҥарар буолбуттарын, онуоха гаджеттар, интэриниэт эйгэтэ улахан сабыдыалын туһунан ырыттылар. Ордук нууччалыы-сахалыы буккуйан саҥарыы, сахалыы этии тутулугар үгүстүк сыыһалары холобурдаатылар.
Салгыы “Ийэ тылым туһугар мин кэскиллээх хардыыларым” түһүмэххэ оҕолор бөлөхтөргө арахсан саха тылын хайдах сүтэрбэт туһугар улууска туох хамсааһыны ыытыахтарын сөбүн бырайыактаан көрдүлэр. Онно ютуб каналыгар сахалыы контеннартан саҕалаан саха тылын сайыҥҥы лааҕырын, оскуолаҕа саха тылын нэдиэлэтигэр тиийэ оҥорон, былааннаан бэйэлэрин санааларын сайа эттилэр.
Түмүктүүр «төгүрүк остуолга» саха тылын харыстыыр, чөлүгэр түһэрэр, сайдарын туһугар үлэ хас биирдии оскуола, кылаас иһигэр илэ-чахчы тиийдэҕинэ эрэ, дьиҥнээх хамсааһын саҕаланыаҕа. Онон оскуолаларга саха эйгэтин үөскэтэргэ, сайыннарарга, төрөөбүт тылбытын харыстыырга оҕолор общественнай хамсааһыннарын тэрийиини көҕүлүүр сыаллаах кэлбит лицей үөрэнээччилэрэ, бэйэлэрин баҕаларынан тэриммит «Күн» түмсүүлэригэр биһиги улууспутуттан 24 оҕо киирдэ, улууска кинилэри салайар, үлэлэтэр педагогтар талылыннылар.
Ийэ тылларын таптыыр оҕолор түмсүүлэрэ хас биирдии оскуолаҕа тэриллэн, улуус аайы кииннэнэн үлэлээн бардахтарына, саха тылын харыстыыр үлэ чахчы көдьүүстээх буолуоҕа диэн эрэнэн тарҕастылар.
Мария Аргунова