Бу күннэргэ Дьокуускай куорат «Спорт 50 сыла» дыбарыаһыгар өрөспүүбүлүкэтээҕи IV «Yлэ-иис күрэҕэ» буолан ааста. Байыаннай дьайыы кыттыылаахтарыгар көмөлөһө сылдьар волонтер иистэнньэҥнэр бэйэлэрин сатабылларын, маастарыстыбаларын көрдөрдүлэр.
Биһиги улууспутуттан тэриллэн барбыт «Ситим» хамаанда бу күрэхтэһиигэ ситиһиилээхтик кытынна. Ол туһунан хамаанда хапытаана, улуустааҕы «Россия ийэлэрэ» хамсааһын салайааччыта Сусанна Аммосова бу курдук кэпсээтэ:
– Биһиги Уус Алдан улууһун хамаандатыгар Мүрүттэн, Хороттон уонна II Лөгөй нэһилиэгиттэн 10 буолан хомуллан тиийэн иистэннибит. Дьиҥэр, биһиги анаан үөрэммит иистэнньэҥнэр буолбатахпыт, ол эрээри улахан баһаардар турбут кэмнэриттэн ыла, онтон байыаннай дьайыыга көмөҕө волонтердаан иистэнэ сылдьабыт. Биһиги маскировочнай сиэккэ да, көстүүм да – барытын тигэбит. Байыаннай дьайыыттан уоппускаҕа кэлбит уолаттарбытын таҥыннарабыт, госпиталларга сытар байыастарга ас-үөл, харысхал ыытабыт.
Бу күрэскэ бастакыбытын кытынныбыт. Ол да буоллар бэриллибит 12 көрүҥ танаһы биир кэмпилиэк оҥорон тиктибит. Тэрээһин чааһыгар эттэххэ, маннык ыгым кэмҥэ бачча элбэх хамаанданы түмэн, матырыйааллары бэлэмнээбиттэрэ хайҕаллаах. Түмүктүүр күҥҥэ Ярославскай аатынан краеведческай түмэлгэ экскурсиялаппыттара, хамаандаттан биирдиилээн дьоҥҥо остуол оонньууларын оонньоппуттара.
Улууспут дьаһалтата барар-кэлэр тыраанспарынан хааччыйбытыгар улахан махталбытын тиэрдэбит. Ону таһынан түмүктүүр төрдүс күммүтүгэр улуус баһалыгын солбуйааччы Анатолий Сторожев, култуура управлениетын начаалынньыга Сергей Нафанаилов, куоракка олорор Уус Алдан түмсүүтүн салайааччыта Егор Неустроев кэлэн эҕэрдэ, махтал тыллары эппиттэрэ уонна хас биирдиибитигэр улуус олоҕор, араас аахсыйаларыгар көхтөөх көмө буола сылдьарбыт иһин улуус баһылыга Василий Иванович аатыттын эҕэрдэ суругу уонна сибэкки дьөрбөтүн туттарбыттара.
Бэйэм ааппыттан, чуолаан кыттыбыт кыргыттарбар, тэрийсэн, түмэн ыыппыт дьоммор улахан махталбын тиэрдэбин. Саха сирин байыастарыгар биир сүбэнэн бэйэбит кыракый кылааппытын киллэрэн кэлбиппититтэн астынныбыт. Уолаттарбыт тоҥмокко-хаппакка сылдьалларыгар уонна кыайыы аргыстаах эргиллэллэригэр баҕарабыт.
Мария АРГУНОВА